“ქართული ოცნების” ხელისუფლებამ ქობულეთში სპორტი მოკლა, ამის შესახებ ბრიფინგზე “ნაციონალური მოძრაობის” წევრმა განაცხადა. ბონდო თედორაძეს ამის მაგალითად საფეხბურთო კლუბში შექმნილი ვითარება მოჰყავს. მისი თქმით, დღეს, ქალაქს გუნდი აღარ გააჩნია, რომელიც მიღწევებით გამოირჩეოდა.
ბონდო თედორაძე ქობულეთის მერის პასუხისმგებლობაზე ამახვილებს ყურადღებას და აღნიშნავს, რომ ლევან ზოიძემ გუნდისა და კლუბის შენარჩუნება ვერ შეძლო, უფრო მეტიც, მისი პოლიტიკის სპორტული ცხოვრება განადგურებულია.
“სამწუხაროდ, “ქართული ოცნების” ხელისუფლებამ და დღევანდელმა ადგილობრივმა მმართველებმა, ქობულეთს ფეხბურთი წაართვეს, რაც უდიდესი ტკივილი და პრობლემაა როგორც ქალაქისთვის, ისე მომავალი თაობისთვის. სად არის დღეს ქობულეთის შუქურა? გუნდი, ქართულ მაფიოზურ კლანური მმართველობის გამო, უმაღლესი ლიგიდან გავარდა და დღეს საკითხავია, მეოთხე ლიგას ითამაშებს თუ არა.
გუნდსაც და შესაბამისად, ბავშვთა ფეხბურთსაც დაახლოებით 10 წლიანი ვარდნა ექნება, რომელთაც შუქურას უმაღლესი და მეორე ლიგიდან დაქვეითება უდიდეს ტვირთად დააწვათ, რადგან შეწყდება ახალგაზრდების დაფინანსება და ისე როგორც 90-იან წლებში, მშობლებს ტრანსპორტირებისთვის, კვებისთვის და ტურნირებში მონაწილეობისთვის ფულის შეკრება მოუწევთ.
საინტერესოა, რას ფიქრობს მერი ლევან ზოიძე, რომლის მმართველობის დროსაც მოისპო ფეხბურთი ქობულეთში? მას ამის საწინააღმდეგოდ და ადგილობრივთა სასარგებლოდ არაფერი გაუკეთებია, მაშინ, როდესაც წინა ხელისუფლებისგან რეაბილიტირებული სტადიონი და შესაბამისი ინფრასტრუქტურა ერგოთ, დღეს სად არიან და რას აკეთებენ? რა პოზიცია აქვთ და რა პასუხი ადგილობრივი ახალგაზრდების წინაშე,” – განაცხადა ბრიფინგზე ბონდო თედორაძემ.
ინფორმაციისთვის: გუშინ, “აჭარა თაიმსი” წერდა, რომ შესაძლოა საფეეხბურთო კლუბ “ქობულეთის შუქურას” საქმიანობით აუდიტის სამსახური დაინტერესდეს. მასალას ვრცლად წაიკითხავთ ბმულზე.
