შრომის ბაზარზე არსებული გამოწვევებისა და პერსპექტივების იდენტიფიცირების მიზნით “საორსამ” ISET-ის კვლევით ინსტიტუტთან თანამშრომლობით პოლიტიკის დოკუმენტი შეიმუშავა. პროექტის ფარგლებში აჭარაში სტუდენტები გამოკითხეს, ასევე, მათი საჭიროებები შეისწავლეს. კვლევის მიგნებები დღეს, სხვადასხვა ორგანიზაციის წარმომადგენლებს გააცნეს.
დაბალი ანაზღაურება, შრომისთვის შეუსაბამო პირობები, საკონსულტაციო ცენტრების არარსებობა და პროფესიების შერჩევისას დამოუკიდებლობის არქონა – ეს იმ საკითხების ჩამონათვალია, რაზეც სტუდენტებმაგამოკითხვისას გაამახვილეს ყურადღება.
“ჩვენ მოვიკვლიეთ აჭარაში სტუდენტებს რა ტიპის გამოწვევები აქვთ. გამოკთხვით ირკვევა, რომ ახალგაზრდებს არ აქვთ კარიერული ცენტრების მომსახურების მიღებისა და კარიერული კონსულტაციების შესაძლებლობა, რომელიც ხელისშემშლელი ფაქტორია მათთვის. გამოკითხვისას ასევე, გამოიკვეთა რომ უმეტეს მათგანს პროფესია დამოუკიდებლად არ აურჩევია, რაც შემდგომში რიგ პრობლემებს იწვევს. პრობლემაა სტაჟირების პროგრამების სიმცირე, დაბალი ანაზღაურება და არარეალური შრომის მოთხოვნები,” – აღნიშნა “აჭარა თაიმსთან” საუბრისას ლანა სიხარულიძემ, რომელიც “საორსას” კვლევის სპეციალისტია.
შეხვედრისას მხარეებმა შრომის ბაზარზე არსებული გამოწვევებისა და პერსპექტივების საერთაშორისო გამოცდილებაზეც ისაუბრეს, რის საფუძველზეც შემუშავებულია შესაბამისი რეკომენდაციები.
“ჩვენ გამოვკითხეთ ასი სტუდენტი. ახალგაზრდებმა იმ საჭიროებებზე გაამახვილეს ყურადღება, რაც მათთვის მნიშვნელოვანია. ირკვევა, რომ ძალიან ბევრი მიმართულებით გვაქვს გამოწვევა. გამოკითხულთა უმეტესობა მიიჩნევს, რომ ანაზღაურება არის დაბალი, როგორც კერძო, ასევე, საჯარო სამსახურში. სტუდენტები იმაზეც ამახვილებენ ყურადღებას რომ დამსაქმებლების მოთხოვნები არარეალისტურია. ზოგიერთი მათგანის აზრით, კი კარიერული ზრდის შესაძლებლობების დეფიციტია. უნდა ითქვას ისიც, რომ სტუდენტების ცნობიერებაც ასამაღლებელია, მათ შრომითი კანონდებლობის მოთხოვნებზე ინფორმაცია არ გააჩნიათ. ხშირ შემთხვევაში არ იციან რა უფლებები აქვთ,” – აღნიშნა ჩვენთან საუბრისას ISET-ის წამყვანმა ეკონომისტმა, სალომე გელაშვილმა.
