შინაგან საქმეთა სამინისტროს ინფორმაციით, საგამოძიებო მოქმედებების შედეგად „ქურდულ სამყაროსთან“ კავშირში მყოფი 29 პირი დააკავეს, ხოლო კიდევ 3 პირს ბრალი დაუსწრებლად წარედგინა. მათ შორის ერთ-ერთი საზღვარგარეთ მყოფი ე.წ. „კანონიერი ქურდია“.
ცენტრალური კრიმინალური პოლიციის დეპარტამენტის დირექტორის, დავით კიკნაძე განცხადებით, გამოძიებით დადგინდა, რომ ბრალდებულები პირადი მატერიალური სარგებლის მიღების მიზნით აქტიურად მონაწილეობდნენ მოქალაქეებს შორის არსებული ფინანსური დავების გადაწყვეტაში.
უწყების ინფორმაციით, კრიმინალური გავლენის გასაძლიერებლად და მოდავე მხარეებზე ფსიქოლოგიური ზეწოლის მიზნით, პროცესში ჩართული იყო საზღვარგარეთ მცხოვრები ე.წ. „კანონიერი ქურდი“ ბესიკ ჯაფარიძე. გამოძიების ვერსიით, მისი მონაწილეობით იმართებოდა ე.წ. „ქურდული გარჩევები“, სადაც კრიმინალური სამყაროს წესების შესაბამისად მიიღებოდა გადაწყვეტილებები, რის საფუძველზეც ერთ-ერთ მხარეს მეორის სასარგებლოდ სოლიდური თანხის გადახდა ეკისრებოდა.
გამოძიების მასალების თანახმად, დაკისრებული ვალდებულებების შეუსრულებლობის ან შეთანხმებული ვადების დარღვევის შემთხვევაში, ბრალდებულები მოქალაქეებსა და მათი ოჯახის წევრებს ფიზიკური ანგარიშსწორებით, ჯანმრთელობის დაზიანებითა და სიცოცხლის მოსპობით ემუქრებოდნენ.
სამართალდამცველებმა ჩატარებული ჩხრეკების შედეგად ნივთმტკიცებად ამოიღეს მობილური ტელეფონები, კომპიუტერული ტექნიკა, ასევე უკანონოდ შეძენილი ცეცხლსასროლი იარაღები და საბრძოლო მასალა.
საქმეზე გამოძიება საქართველოს სისხლის სამართლის კოდექსის 223-ე პრიმა, 223-ე ტერცია, 223-ე კვარტა და 236-ე მუხლებით მიმდინარეობს. აღნიშნული დანაშაულები 15 წლამდე ვადით თავისუფლების აღკვეთას ითვალისწინებს.
შინაგან საქმეთა სამინისტროში აცხადებენ, რომ ორგანიზებულ დანაშაულთან, მათ შორის ე.წ. „ქურდულ სამყაროსთან“ დაკავშირებული დანაშაულებრივი საქმიანობის წინააღმდეგ ბრძოლა უწყების ერთ-ერთ მთავარ პრიორიტეტად რჩება.
