„დინამო ბათუმმა“ 27 წლის ბრაზილიელი მარცხენა გარემარბი, პაულო ვიტორი დაიმატა. როგორც თავად კლუბში აცხადებენ, ბრაზილიელთან კონტრაქტი 2028 წლის ბოლომდეა გაფორმებული.
„საფეხბურთო კლუბი „დინამო ბათუმი“ მოხარულია გაცნობოთ, რომ ბრაზილიელი მარცხენა გარემარბის, პაულო ვიტორის ტრანსფერთან დაკავშირებით „პორტიმონენსესთან“ მოლაპარაკება წარმატებით დასრულდა. ფეხბურთელმა ჩვენს კლუბთან ხელშეკრულება 2028 წლის ბოლომდე გააფორმა“, – წერია „დინამო ბათუმის“ განცხადებაში.
ვიტორი „თოლიებს“ პორტუგალიური „პორტიმონენსედან“ შეუერთდა. პორტუგალიურ კლუბში ბრაზილიელს 26 მატჩი აქვს ჩატარებული, სადაც 9 გოლი გაიტანა და 4 საგოლე გადაცემა შეასრულა. თავად პაულო ბრაზილიური „ვასკო და გამას“ აღზრდილია და პროფესიული კარიერაც სწორედ სამშობლოში, 2017 წელს დაიწყო.
„მიხარია, რომ ისეთი ისტორიული კლუბის ნაწილი გავხდი, როგორიც „დინამო ბათუმია“. ჩემი სურვილია, ამ მაისურით რაც შეიძლება მეტი გოლი გავიტანო და კლუბს წარმატებაში დავეხმარო“, – ამბობს პაულო ვიტორი.
ასევე აღსანიშნავია, რომ ვიტორს ბრაზილიის 20-წლამდელთა ნაკრებში სამი მატჩი აქვს ჩატარებული. 27 წლის გარემარბი უკვე შეუერთდა „დინამო ბათუმს“ თურქეთში მიმდინარე საზაფხულო შეკრებაზე.
ავტორი: დიმიტრი გორგილაძე
