შუახევში, საავტომობილო გზაზე მეწყერი ჩამოწვა, რომლის გაწმენდითი სამუშაოები მიმდინარეობს.
ბათუმი-ახალციხის დამაკავშირებელი გზის, სოფელ გორხანაულის მონაკვეთზე სატრანსპორტო მიმოსვლა შეიზღუდა.
შუახევის მერიის ცნობით, გადაადგილება შესაძლებელია მაღალი გამავლობის ავტომობილით, დაბაძველი-ოქროპილაურის შემოვლითი გზით.
“შუახევში, რამდენიმე დღეა გადაუღებლად წვიმს, რის შედეგადაც ბათუმი-ახალციხის შუახევის საავტომობილო გზაზე განვითარდა მეწყრული პროცესი. სალიკვიდაციო სამუშაოებში ჩართულია საქართველოს საავტომობილო გზების დეპარტამენტის, აჭარის საავტომობილო გზების დეპარტამენტისა და მუნიციპალური სერვისების სააგენტოს სპეც-ტექნიკა,” – აცხადებენ შუახევის მერიაში.
