დაბა ხულოსა და სოფელ თაგოს დამაკავშირებელი საბაგირო რამდენიმე თვეა, რაც გაჩერებულია. გადაადგილებისთვის ერთ-ერთ მარტივ და მოსახერხებელ ტრანსპორტს ადგილობრივები, ასევე, ტურისტები ვეღარ იყენებენ.
საბაგირო ტექნიკური გამოუმართავობის გამო გათიშეს და რეაბილიტაციისთვის ამზადებენ, თუმცა სამუშაოები ამ დრომდე არ დაწყებულა. თაგო წლის ნებისმიერ დროს ტურისტულად მიმზიდველი და დატვირთულია, მაგრამ შემოვლითი გზა იმდენად დიდი და მოუხერხებელია, მეტწილად სოფელში სტუმრობისგან ბევრი თავს იკავებს.
ვიზიტორების შემცირებით ადგილობრივები დაზარალდნენ, რომლებიც ეკონომიკურ საქმიანობას ეწევიან. შემცირებულ ჯავშნებსა და შემოსავლებზე საუბრობენ კოტეჯების მფლობელებიც.
“გეგმიური შემოწმების შედეგად, ძირითად მზიდ ბაგირზე დაფიქსირდა ხარვეზები, რაც შეუსაბამოა საბაგიროს შემდგომი უსაფრთხო ექსპლუატაციისთვის,” – გვითხრეს ხულოს მერიაში, თუმცა უწყებაში ვერ განმარტეს როდის დაიწყება შეკეთების პროცესი. ირკვევა, რომ ხულოს მერია ამ ეტაპზე საბაგიროს საპროექტო დოკუმენტაციას ამზადებს.
“პროექტის განხორციელების პერიოდში გადაადგილების კუთხით მოსახლეობა არ ფერხდება. მათ, დღეში ერთხელ, ემსახურებათ მუნიციპალიტეტის დაფინანსებით მიკრო ავტობუსი,” – განაცხადეს ხულოს მერიაში.
ინფორმაციისთვის: ხულო-თაგოს საბაგირო გზა სიგრძითა და სიმაღლით ევროპაში მეორე ადგილზეა. უსაყრდენო საბაგირო გზის სიგრძე 1720, ხოლო სიმაღლე 280 მეტრია. საზოგადოებრივ ტრანსპორტს მხოლოდ ტურისტული დანიშნულება არ გააჩნია, ის ხულოს ცენტრიდან სოფელ თაგოში მისასვლელად გზის შემოკლების ერთადერთი საშუალებაა.
საბაგიროს მეშვეობით დაბა ხულოსთან დაკავშირება 8 წუთშია შესაძლებელი. საბაგირო 1985 წელს გაიხსნა, მისი ამოქმედება ცნობილი ინჟინერისა და არქიტექტორის, შოთა ორჯონიკიძის სახელს უკავშირდება.
