ხულო და მისი პერსპექტივები – თემაზე საინფორმაციო შეხვედრა გაიმართა, რომლის ფარგლებშიც მაღალმთიანი აჭარის საჭიროებებსა და გამოწვევებზე ისაუბრეს. კერძოდ, სპეციალისტებმა ყურადღება გაამახვილეს გოდერძის უღელტეხილის, კურორტ ბეშუმისა და მიმდებარე ტერიტორიების შესწავლის შედეგად გამოვლენილ დარღვევებზე.
სპეციალისტების შეფასებით ხულოს მერიამ გენერალურ გეგმაზე მუშაობა უნდა შეაჩეროს, რომლის დაჩქარებული წესით მიღებას ცდილობენ. აღნშნავენ, რომ ამ მიმართულებით არაერთი გამოწვევაა, რისი გათვალისწინებაც არ ხდება. მათ შორის საუბარია პროცედურულ და საკანონმდებლო დარღვევებზე.
“ჩვენ საზოგადოებას ვაცნობთ გენერალური გეგმის დამტკიცების პროცესში გამოკვეთილ ადამიანის უფლებების, კერძო საკუთრების და სხვა მიმართულებებით მძიმე დარღვევებს და დამოუკიდებელ გეოლოგიურ დასკვნებს, რომელთა მიხედვითაც გადაუდებელ აუცილებლობად მივიჩნევთ სასწრაფოდ შეჩერებულ იქნას ხელისუფლების მხრიდან გენერალური გეგმის დამტკიცების დაჩქარებული პროცესი, რომელიც საზოგადოებისგან, ადგილობრივი მოსახლეობისგან ფარულად რიგი პროცედურული, საკანონმდებლო დარღვევებით მიმდინარეობს. გარდა ამისა, იგი შეიცავს მკვეთრად გამოხატულ კორუფციული გარიგებების და თანამდებობრივი გულგრილობის ნიშნებს,” – აცხადებენ საინიციატივო ჯგუფ “ხულო და მისი პერსპექტივების” სპეციალისტები.
