ბათუმის შემოსასვლელის გაფართოების სამუშაოები დაიწყო. განთიადის მონაკვეთზე უკვე მიმდინარეობს საცხოვრებელი სახლების დემონტაჟი.
ადგილზე არსებული ვითარების მიხედვით, გზის ერთ მხარეს სახლები სრულადაა დაშლილი, ხოლო მეორე მხარეს დემონტაჟი ნაწილობრივ მიმდინარეობს. ადგილობრივების ნაწილი ამბობს, რომ ამ დრომდე არ იციან, შეეხება თუ არა პროექტი მათ საცხოვრებლებს.
მოსახლეობა საჯაროდ კომენტარის გაკეთებას ერიდება, თუმცა პირად საუბრებში აცხადებენ, რომ სახელმწიფოს მიერ დასახელებული კომპენსაციის ოდენობა მათთვის მიუღებელია.
„აჭარა თაიმსი“ თემასთან დაკავშირებით ბათუმის მერიას დაუკავშირდა. უწყებაში არ განმარტავენ, კონკრეტულად რას ითვალისწინებს პროექტი, რამდენი ოჯახის გასახლება იგეგმება და რა ოდენობის კომპენსაციას სთავაზობენ მათ.
მერიაში მხოლოდ შემდეგი განმარტება გააკეთეს:
„ჩაქვის გვირაბიდან საბაგირომდე, ოთხზოლიანი გზის მოწყობის პროექტის ფარგლებში მიმდინარეობს ქუჩის გაფართოება. რაც შეეხება ბარაკებს, პროექტის განხორციელების მიზნებიდან გამომდინარე მოხდა მათი აღება“.
ამ ეტაპზე ჩვენთვის უცნობია, რა ვადებში დასრულდება გზის გაფართოების სამუშაოები და როგორ გაგრძელდება მოსახლეობასთან მოლაპარაკების პროცესი.
