ოპოზიცია მმართველ პარტიას კვლავ ზეწოლასა და დაშინებაში ადანაშაულებს. “ნაციონალური მოძრაობის” ოფისში გამართულ ბრიფინგზე ნიკა ქაშიბაძემ განაცხადა, რომ ამომრჩეველთა სიებში, მათივე ინფორმაციით, არიან გარდაცვლილი პირები, ასევე, სკოლებში, დირექტორები მშობლებს პირადობების მოწმობებს ართმევენ.
“ქართული ოცნება აგრძელებს ძალადობას ამომრჩევლებზე. სკოლებში მშობლებს ართმევენ პირადობის მოწმობებს და ახდენენ ზეწოლას ქართული ოცნების მხარდასაჭერად. მაგალითისთვის – ხელვაჩაურში, აჭარისწყლის სკოლის დირექტორის ლელა გორგოშაძის დავალებით გასულ კვირას მასწავლებლებმა მშობლებს მიატანინეს სკოლაში პირადობის მოწმობები და დღემდე არ დაუბრუნებით. პირადობის მოწმობების მიტანის და დღემდე არ დაბრუნების მიზეზს არ ეუბნებიან მშობლებს. ასევე აღსანიშნავია, რომ საარჩევნო სიებში შეყვანილი ჰყავთ გარდაცვლილები, როგორც ჩანს წელსაც გარდაცვლილი ადამიანების იმედად არის დარჩენილი ივანიშვილის რეჟიმი. მოვითხოვთ: დაუყოვნებლივ დაიწყოს შესწავლა რა მიზეზით და უფლებით ართმევენ მშობლებს პირადობის მოწმობებს დაუყოვნებლივ, დღესვე დაბრუნებული იქნას უკანონოდ წართმეული პირაოდბის მოწმობები შესწავლილი იქნას, როგორ აღმოჩნდნენ გარდაცვლილი ადამიანები სააღცევნო სიებში და ამოღებული იქნას სიიდან. ცესკომ და უსკომ მოახდინონ სათანადო რეაგირება,” – განაცხადა ნიკა ქაშიბაძემ ბრიფინგზე.
ოპოზიციის ბრალდებას ადრესატებმა არ უპასუხეს. იმ შემთხვევაში თუ აჭარის განათლების სამინისტროსა და ოლქში საპასუხო კომენტარი გაკეთდება მასალა განახლდება.
