ფინანსთა სამინისტროს საგამოძიებო სამსახურმა განსაკუთრებით დიდი ოდენობით უაქციზო თამბაქოს შენახვა-რეალიზაციის ფაქტზე ერთი პირი დააკავა. უწყების ინფორმაციით, დაკავებულმა პირი აქციზური მარკის გარეშე ინახავდა და გადააზიდავდა სიგარეტის მსხვილ პარტიას.
გამოძიების ფარგლებში ჩატარებული ოპერატიულ-სამძებრო და საგამოძიებო მოქმედებების შედეგად, ამოიღეს 93 000 კოლოფი უაქციზო სიგარეტი, კერძოდ, Marlboro, Parliament, Sobranie და Winston. დოკუმენტის თანახმად, ამოღებული პროდუქციის საერთო ღირებულება 750 000 ლარს აღემატება.
საქმეზე გამოძიება გრძელდება საქართველოს სისხლის სამართლის კოდექსის 200-ე მუხლის მესამე ნაწილის საფუძველზე, რაც სასჯელის სახით 6-დან 8 წლამდე თავისუფლების აღკვეთას ითვალისწინებს.
