საქართველოს ყოფილი პრემიერ-მინისტრი ირაკლი ღარიბაშვილი აცხადებს, რომ საზოგადოებამ მის მიერ გამოქვეყნებული წერილის ნამდვილობაში და მასში აღწერილ ფაქტებში უნდა დარწმუნდეს. მისი თქმით, მამუკა მდინარაძის მიერ დაშვებულმა „მძიმე და უხეშმა შეცდომებმა“ მისი თანამდებობიდან მოხსნა და პოლიტიკიდან წასვლა გამოიწვია.
ღარიბაშვილი აცხადებს, რომ მდინარაძის პოლიტიკიდან წასვლა ვერ გააქრობს იმ ზიანს, რომელიც, მისი შეფასებით, მისმა და ირაკლი კობახიძის თანამონაწილეობამ ქვეყანასა და „ქართულ ოცნებას“ მიაყენა. ყოფილი პრემიერი განსაკუთრებულ ყურადღებას ამახვილებს მისი განცხადების იმ ნაწილზე, სადაც ჟურნალისტი დიტო ჩუბინიძე და „პატრიოტთა ალიანსის“ ლიდერი ირმა ინაშვილი არიან ნახსენები.
ღარიბაშვილის თქმით, 12 თებერვალს, ირაკლი კობახიძისა და მამუკა მდინარაძის დავალებით, მას 2026 წლის 2 თებერვლის გაზეთ „ასავალ-დასავალში“ გამოქვეყნებული დიტო ჩუბინიძის სტატია გაუგზავნეს. მისივე განცხადებით, სტატიაში ყოფილ უფლებადამცველ ლაზარე ჯორბენაძესთან ინტერვიუ იყო გამოქვეყნებული, რომელიც ძირითადად ირაკლი კობახიძის კრიტიკასა და მის მიმართ გამოთქმულ ბრალდებებს ეხებოდა.
ღარიბაშვილის მტკიცებით, მასთან გამოგზავნილ გზავნილში გამოითქვა ეჭვი, ხომ არ იდგა თავად აღნიშნული სტატიის უკან. როგორც ყოფილი პრემიერი წერს, მან ეს ბრალდება უარყო და განაცხადა, რომ მსგავსი „შეკვეთილი სტატიები“ მისი ხელწერა არ არის.
„მოგვიანებით ეს კრიტიკული ბრალდებები ხშირად მეორდებოდა ტელეკომპანია „ობიექტივის“ ეთერშიც“, – წერს ღარიბაშვილი.
მისი თქმით, აღნიშნული საკითხი განსაკუთრებით აქტუალური მას შემდეგ გახდა, რაც შემთხვევით შეიტყო, რომ დიტო ჩუბინიძის მიერ მომზადებული სტატიის რესპონდენტმა, ლაზარე ჯორბენაძემ, მოგვიანებით თავი მოიკლა.
ღარიბაშვილი ასევე აცხადებს, რომ მისთვის ცნობილი გახდა „ასავალ-დასავალის“ მიერ ჯორბენაძის თვითმკვლელობის ვერსიის შესახებ დასმული კითხვების შესახებ.
ყოფილი პრემიერ-მინისტრი საჯაროდ სვამს კითხვას, რა გახდა ლაზარე ჯორბენაძის გარდაცვალების რეალური მიზეზი.
„პასუხი უნდა გაეცეს შემდეგ კითხვას: რა გახდა უფლებადამცველი ლაზარე ჯორბენაძის გარდაცვალების რეალური მიზეზი?“ – წერს ირაკლი ღარიბაშვილი.
მისივე შეფასებით, საზოგადოებაში კვლავ არსებობს პასუხგაუცემელი კითხვები სხვა ადამიანების თვითმკვლელობის ფაქტებთან დაკავშირებითაც, რომლებიც, მისი თქმით, ირაკლი კობახიძისა და მამუკა მდინარაძის მმართველობის პერიოდში მოხდა.
ღარიბაშვილის განცხადებაში მოყვანილი ბრალდებებისა და ეჭვების დამადასტურებელი მტკიცებულებები განცხადებაში არ არის წარმოდგენილი.
პროკურატურამ ირაკლი ღარიბაშვილს განსაკუთრებით დიდი ოდენობით ქრთამის აღებაში ბრალი წარუდგინა
ირაკლი ღარიბაშვილმა სახელმწიფოს რამდენიმე მილიონ ლარამდე ზიანი მიაყენა – პროკურატურა
