სარფის საბაჟო-გამშვებ პუნქტზე 1.8 კილოგრამზე მეტი ოქროს საიუველირო ნაკეთობის უკანონოდ შემოტანის ფაქტზე ერთი პირი დააკავეს.
ფინანსთა სამინისტროს საგამოძიებო სამსახურის ინფორმაციით, განსაკუთრებით დიდი ოდენობით საქონლის გადაადგილების წესის დარღვევის ფაქტი გამოვლინდა.
გამოძიების ცნობით, საქართველოს მოქალაქემ საბაჟო-გამშვები პუნქტი „სარფის“ გავლით, მის მართვაში არსებული ავტომობილის სალონში, სპეციალურად მოწყობილი სამალავების გამოყენებით, მალულად შემოიტანა 1 851 გრამი ოქროს საიუველირო ნაკეთობა.
ამოღებული ძვირფასეულობის საბაჟო ღირებულება 411 962 ლარს შეადგენს.
საქმეზე გამოძიება საქართველოს სისხლის სამართლის კოდექსის 214-ე მუხლის მე-2 ნაწილით მიმდინარეობს, რაც 5-დან 7 წლამდე თავისუფლების აღკვეთას ითვალისწინებს.
