შინაგან საქმეთა სამინისტროს ინფორმაციით, ჩატარებული საგამოძიებო და ოპერატიულ-სამძებრო მოქმედებების შედეგად, ორი პირის მიმართ ჯანმრთელობის განზრახ მძიმე დაზიანებისა და მუქარის ბრალდებით, წარსულში სხვადასხვა დანაშაულისთვის ნასამართლევი სამი პირი – 1983 წელს დაბადებული ი.დ., 1983 წელს დაბადებული ო.ჯ. და 1984 წელს დაბადებული ხ.ა. დაკავებულია.
გამოძიებით დადგინდა, რომ მიმდინარე წლის 19 ოქტომბერს, ბათუმში, ურთიერთშელაპარაკებისას, ი.დ.-მ და ო.ჯ.-მ 1982 წელს დაბადებულ მ.ფ.-ს და 2005 წელს დაბადებულ გ.ფ.-ს ცივი იარაღის გამოყენებით სხეულის სხვადასხვა არეში დაზიანებები მიაყენეს.
ამავე ინციდენტისას, ხ.ა. დაზარალებულებს სიცოცხლის მოსპობით დაემუქრა.
დაშავებულები სამედიცინო დაწესებულებაში გადაიყვანეს, სადაც შესაბამისი დახმარება გაეწიათ. სამივე ბრალდებული პოლიციამ უკვე დააკავა.
საქმეზე გამოძიება სისხლის სამართლის კოდექსის 117-ე (ჯანმრთელობის განზრახ მძიმე დაზიანება) და 151-ე (მუქარა) მუხლებით მიმდინარეობს, რაც 13 წლამდე ვადით თავისუფლების აღკვეთას ითვალისწინებს.
