„აჭარა თაიმსის“ მიერ გავრცელებული ინფორმაცია დადასტურდა – ქობულეთის საბავშვო ბაღების გაერთიანების დირექტორი ია ხალვაში თანამდებობიდან გათავისუფლებულია. არსებული ინფორმაციით, იგი პირდაპირ სახლში გაუშვეს და სხვა პოზიცია არ შეუთავაზებიათ.
ია ხალვაშის შესაძლო გათავისუფლების შესახებ „აჭარა თაიმსი“ რამდენიმე დღის წინ წერდა. ინფორმაციის გასაჯაროების შემდეგ სოციალურ ქსელში მწვავე დისკუსია დაიწყო. მოქალაქეების ნაწილი რეალური პროფილებიდან წერდა, რომ საბავშვო ბაღებში დასაქმებისა და ბავშვების მიღების სანაცვლოდ თანხის მოთხოვნის პრაქტიკა არსებობდა.
ბრალდებები სიმართლეს შეესაბამება თუ საქმე ცილისწამებასთან გვაქვს – ამ ეტაპზე უცნობია. აღნიშნულ კომენტარებზე ქობულეთის მერიას რეაგირება არ მოუხდენია. უწყებაში „აჭარა თაიმსს“ განუცხადეს, რომ სოციალურ ქსელში გავრცელებული კომენტარების შეფასება მათი კომპეტენცია არ არის.
ამ დროისთვის საქმე ია ხალვაშის გათავისუფლებით დასრულდა, თუმცა „აჭარა თაიმსის“ წყაროები არ გამორიცხავენ, რომ მომავალში ქობულეთის საბავშვო ბაღების საქმიანობით საგამოძიებო ორგანოები დაინტერესდნენ.
ამავე დროს ცნობილი გახდა, რომ აიპი ქობულეთის საბავშვო ბაღების გაერთიანებას უკვე ახალი ხელმძღვანელი ჰყავს. გუშინ, გვიან ღამით, ხელმძღვანელად თანამდებობაზე ირმა მეგრელიძე დაინიშნა. იგი მანამდე ქობულეთის კოლეჯ „ახალი ტალღა“-ს დირექტორი იყო.
ჩვენი ინფორმაციით, ირმა მეგრელიძის დანიშვნის პროცესში აქტიურად იყო ჩართული საპატრიარქო და ადგილობრივი ეპარქია. ცნობილია, რომ მისი მეუღლე სასულიერო პირია და ქობულეთის ერთ-ერთ ტაძარში მსახურობს.
ამასთან, ქობულეთის მერიაში ოფიციალურად გამოცხადდა საყოველთაო რეორგანიზაცია, რომელიც როგორც დაბალი, ისე მაღალი რგოლის საჯარო მოხელეებს შეეხება. პროცესის დეტალები და შესაძლო საკადრო ცვლილებები ამ ეტაპზე საჯაროდ არ კონკრეტდება.
„აჭარა თაიმსი“ მოვლენების განვითარებას დააკვირდება და დამატებით ინფორმაციას მიღებისთანავე შემოგთავაზებთ.
