სამსახურებრივი უფლებამოსილების ბოროტად გამოყენების ბრალდებით შინაგან საქმეთა სამინისტროს დაცვის პოლიციის დეპარტამენტის მოსამსახურე დააკავეს. ინფორმაციას შსს ავრცელებს.
უწყების ცნობით, 1997 წელს დაბადებულ ე.კ.-ს ხელბორკოლები მოსამართლის განჩინების საფუძველზე დაადეს. გამოძიებით დადგინდა, რომ დაცვის პოლიციის დეპარტამენტის თანამშრომელი, სამსახურებრივი უფლებამოსილების ბოროტად გამოყენებით, ბათუმის ბულვარში უკანონო მფარველობას უწევდა მეუღლის მშობლების ბიზნესსაქმიანობას.
შსს-ს გენერალური ინსპექციის თანამშრომლებმა ჩატარებული საგამოძიებო მოქმედებების შედეგად ე.კ. ბრალდებულის სახით დააკავეს. გამოძიება სისხლის სამართლის კოდექსის 332-ე მუხლით მიმდინარეობს, რაც 3 წლამდე თავისუფლების აღკვეთას ითვალისწინებს.
შინაგან საქმეთა სამინისტრო ასევე აღნიშნავს, რომ აღნიშნული სისხლის სამართლის საქმის ფარგლებში, მიმდინარე წლის 31 იანვარს, ქრთამის აღების ბრალდებით უკვე დაკავებულია დაცვის პოლიციის დეპარტამენტის კიდევ ერთი თანამშრომელი – 2002 წელს დაბადებული ა.მ.
უწყების ინფორმაციით, ა.მ.-მ გარევაჭრობის მფარველობის სანაცვლოდ მოქალაქისგან ქრთამის სახით გარკვეული ოდენობის თანხა აიღო. აღნიშნულ ფაქტზე გამოძიება სისხლის სამართლის კოდექსის 338-ე მუხლით მიმდინარეობს, რაც 9 წლამდე ვადით თავისუფლების აღკვეთას ითვალისწინებს.
