ბათუმში, ქეთევან წამებულის ქუჩაზე მცხოვრებლები თითქმის ერთი წელია ინფრასტრუქტურის მოწესრიგებას ითხოვენ. მათი თქმით, სარეაბილიტაციო სამუშაოები ნელი ტემპით მიმდინარეობს, რაც ყოველდღიურ ცხოვრებას სერიოზულად ართულებს.
გაჭიანურებული პროცესის გამო, წვიმიან ამინდში ქუჩაზე წყლის დიდი გუბეები დგება, ხოლო მზიან ამინდში მტვერია. ადგილობრივები ამბობენ, რომ მტვერი და წყალი საცხოვრებელი სახლების პირველ სართულებამდე აღწევს.
ატალახებული გზის გადალახვა უჭირთ როგორც ქვეითებს, ისე მძღოლებს. მოსახლეობის განცხადებით, სარეაბილიტაციო სამუშაოების მიმდინარეობისას დაზიანდა კანალიზაციის მილები, რის გამოც ქსელი ხშირად იჭედება და დამატებით პრობლემებს ქმნის.
ადგილობრივების თქმით, მათთვის უცნობია, როდის დასრულდება სამუშაოები. ისინი აცხადებენ, რომ დასახლებაში მერის წარმომადგენელი ინფორმაციას არ აწვდის, ხოლო ქუჩაზე არ არის განთავსებული საინფორმაციო ბანერი, სადაც პროექტის ვადები და დეტალები იქნებოდა მითითებული.
„ქეთევან წამებულის ქუჩისა და ჩიხების რეაბილიტაცია პროექტით განსაზღვრული გრაფიკით მიმდინარეობს.
სამუშაოების განხორციელების პერიოდში წყალარინების მილების დაზიანება არ დაფიქსირებულა. დისკომფორტს იწვევს გაუმართავი სანიაღვრე სისტემა, რაც ქუჩის რეაბილიტაციის დასრულების შემდეგ აღმოიფხვრება.
სანიაღვრე სისტემის მოწყობა უკვე დასასრულს უახლოვდება, რის შემდეგაც შესაძლებელი გახდება ასფალტის საფარის დაგება. სამუშაოები მაისის ბოლომდე დასრულდება,“ – მოგვწერეს „ქართული ოცნების“ ბათუმის მერიიდან.
