ბათუმის ბულვარში, „კლარას ჰოთ-დოგებით“ ცნობილ ობიექტს აღარ ანგრევენ. მიუხედავად იმისა, რომ შენობის დემონტაჟი უკვე დაწყების ეტაპზე იყო, პროცესი სავარაუდოდ, საზოგადოების პროტესტის გამო შეჩერდა.
ობიექტის მეპატრონეს შენობა ინვენტარისგან დააცლევინეს, ამოიღეს ფანჯრები და კარები. გუშინ კი, დემონტაჟის მიზნით, ტერიტორიაზე მძიმე ტექნიკა და შესაბამისი სამსახურების თანამშრომლებიც იყვნენ მობილიზებული.
მას შემდეგ, რაც „აჭარა თაიმსმა“ აღნიშნული ინფორმაცია გაავრცელა, ფაქტს დიდი გამოხმაურება მოჰყვა. უკმაყოფილებას აფიქსირებდნენ „ქართული ოცნების“ მხარდამჭერებიც.
დღეს ობიექტი აღარ არის შემოსაზღვრული უსაფრთხოების ლენტით, ხოლო ფანჯრებსა და კარებში მინები დააბრუნეს.
მიზეზების გასარკვევად „ბათუმის ბულვარის ადმინისტრაციას“ დავუკავშირდით, სადაც განმარტავენ, რომ კაფე-ბარი დიდი ხანია საჭიროებდა განახლება, რაც ბულვარის განვითარების გეგმით არის გათვალისწინებული.
მათივე ინფორმაციით, აღნიშნულ ობიექტს საიჯარო ხელშეკრულების ვადა ამოწურული ჰქონდა, რის გამოც უახლოეს პერიოდში გამოცხადდება აუქციონი.
ადმინისტრაციაში აცხადებენ, რომ ამ პროცესის შემდეგ ობიექტი ფუნქციონირებას გააგრძელებს.
⇒ ბათუმის ბულვარში მდებარე ქორწინების სახლი დაანგრიეს
⇒ ბათუმის ბულვარში მეუღლის მშობლების ბიზნესის მფარველობისთვის დაცვის პოლიციის თანამშრომელი დააკავეს
