სუვენირებითა და ნატურალური წვენებით მოვაჭრეებმა შეკვეთილში, ბიძინა ივანიშვილის სახლთან საპროტესტო აქცია გამართეს.
თვითდასაქმებულები ადგილზე იმ მიზნით მივიდნენ, რომ ივანიშვილთან შეხვედრა შეძლებდნენ და საკუთარ პრობლემებს უშუალოდ გააცნობდნენ.
აქციის მონაწილეები აცხადებენ, რომ უკვე მესამე თვეა გაურკვევლობაში არიან და არ იციან, როდის შეძლებენ საქმიანობის განახლებას. მათი თქმით, წინა პროტესტის შედეგად მათ ბათუმის მერი შეხვდა, თუმცა კონკრეტული დაპირებები ვერ მიიღეს.
მოვაჭრეები მიიჩნევენ, რომ გადაწყვეტილების მიღებაზე გავლენა აქვს ბიძინა ივანიშვილს, რის გამოც პროტესტის გამართვა სწორედ მის საცხოვრებელთან გადაწყვიტეს.
ცნობისთვის, ბათუმის ბულვარსა და გოგებაშვილის ქუჩაზე განთავსებული სავაჭრო ჯიხურები ბათუმის მერიამ აიღო, რის შედეგადაც დაახლოებით 50 ადამიანი უმუშევარი დარჩა.
გადაწყვეტილება ქალაქის იერსახის მოწესრიგების აუცილებლობით აიხსნა, თუმცა მოვაჭრეები მიუთითებენ, რომ აღნიშნული კონსტრუქციები თავის დროზე სწორედ მერიის ნებართვით ჰქონდათ განთავსებული.
თვითდასაქმებულებმა მოგვიანებით შეკვეთილიდან ბათუმში, აჭარის უმაღლესი საბჭოს შენობასთან გადაინაცვლეს, სადაც კომიტეტების გაერთიანებულ სხდომაზე ზურაბ პატარაძის ხედვებს ისმენდნენ, მის აჭარის მთავრობის თავმჯდომარედ დამტკიცებამდე.
უმაღლესი საბჭოს შენობასთან შეკრებილებს აპარატის უფროსი შეხვდა და მათ მიმართა, რომ ბათუმის მერიაში გადაინაცვლონ, სადაც მერი შესახვედრად მზადაა.
დაკავშირებული თემები ⇓
თვითდასაქმებულებმა არ იციან როდის გააგრძელებენ ვაჭრობას – პროტესტი აჭარის მთავრობასთან
ელექტრო სკუტერებისა და მოპედების მფლობელების პროტესტი და მოთხოვნა
