„საკალათბურთო კლუბმა ბათუმმა“ მეოთხედფინალის მეორე შეხვედრა წააგო. „ბათუმელები“ დაძაბულ მატჩში 94:95 დამარცხდნენ „სკ ივერიონთან“.
აღნიშნული გამარჯვებით „გორელებმა“ საფლეი-ოფის სერიაში ანგარიში გაათანაბრეს – 1:1.
მატჩი თანაბრად დაიწყო. ბუბა ბერიშვილის გაწვრთნილმა გუნდმა უპირატესობა მეორე მეოთხედში მოიპოვა, თუმცა „ივერიონმა“ მესამე და მეოთხე მეოთხედებში თამაშის ბედი შემოატრიალა და მეტოქეს ერთი ქულით აჯობა.
თამაშის საუკეთესო კალათბურთელად მილერი („სკ ივერიონი“) დასახელდა. მის ანგარიშზეა 40 ქულა, ექვსი მოხსნა, შვიდი ასისტი და ეფექტიანობის კოეფიციენტი (EFF) – 37. „ბათუმის“ მხრიდან ყველაზე გამორჩეული ლომიძე იყო – 21 ქულით, ხუთი მოხსნით, ოთხი პასითა და ეფექტიანობის კოეფიციენტით – 28.
„სკ ბათუმი“ და „სკ ივერიონი“ მეოთხედფინალის მესამე შეხვედრას 29 აპრილს გამართავენ.
ავტორი: დიმიტრი გორგილაძე
