„საკალათბურთო კლუბი ბათუმი“ სუპერლიგის ნახევარფინალური სერიის პირველ შეხვედრაში დამარცხდა. ფლეი-ოფის პირველი მატჩში „სკ ბათუმი“ „ქუთაისი 2010“-ს დაუპირისპირდა და შეხვედრა ანგარიშით 70:76 წააგო.
„ბათუმმა“ თამაში კარგად დაიწყო და პირველ ორ მეოთხედში მეტოქეს აჯობა – 24:20 და 19:17. თუმცა, შეხვედრის მეორე ნახევარში „ქუთაისმა“ ბრძოლისუნარიანობა გამოავლინა და მატჩის შემოტრიალება შეძლო. მესამე და მეოთხე მეოთხედები სტუმართა უპირატესობით დასრულდა – 14:19 და 13:20.
მატჩის საუკეთესო კალათბურთელად „ბათუმის“ ლეგიონერი მაირინ ტომასი დასახელდა. მის ანგარიშზე 22 ქულა, 15 მოხსნა, სამი პასი და ეფექტიანობის კოეფიციენტი (EFF) 30 იყო.
„ქუთაისი 2010“-ის შემადგენლობაში საუკეთესო ამერიკელი დიტრიკ ბრაუნინგი გახლდათ – 25 ქულით, 10 მოხსნით, სამი პასითა და ეფექტიანობის კოეფიციენტით (EFF) 22. „სკ ბათუმისა“ და „ქუთაისი 2010“-ის ნახევარფინალური სერიის მეორე შეხვედრა 10 მაისს გაიმართება.
ავტორი: დიმიტრი გორგილაძე
