საქართველოს უსინათლოთა კავშირის აჭარის ფილიალში ხელმძღვანელის არჩევის პროცესი ხმაურისა და პროტესტის ფონზე გაიმართა. ორგანიზაციის წევრთა ნაწილი არჩევნების ლეგიტიმურობას ეჭვქვეშ აყენებს და აცხადებს, რომ პროცესი წინასწარ განსაზღვრული სცენარის ნაწილია.
არჩევნებში მხოლოდ ერთი კანდიდატი, მარინა სარალიძე მონაწილეობდა, რომელიც საბოლოოდ აჭარის ფილიალის ხელმძღვანელად ერთხმად აირჩიეს. კავშირის ინფორმაციით, ორგანიზაცია 311 წევრს აერთიანებს, თუმცა კენჭისყრაში მონაწილეობა მხოლოდ 65-მა ადამიანმა მიიღო. თავმჯდომარეს წევრები ხუთი წლის ვადით ირჩევენ.
პროცესის პარალელურად, შენობის გარეთ უკმაყოფილო წევრები შეიკრიბნენ. ისინი აცხადებდნენ, რომ არჩევნები გამჭვირვალე არ იყო და გადაწყვეტილება ვიწრო წრეში მიიღეს. მათი შეფასებით, რეალური კონკურენციის გარეშე ჩატარებული არჩევნები მხოლოდ ფორმალურ ხასიათს ატარებდა.
ვითარება განსაკუთრებით მედიის გამოჩენის შემდეგ გამწვავდა. ჟურნალისტებს არჩევნების პროცესის გადაღების საშუალება არ მოგვეცა. ადგილზე მყოფი კომისიის წევრები მედიის წარმომადგენლებს შენობაში შესვლის უფლებას არ აძლევდნენ.
„აჭარა თაიმსის“ დამფუძნებელი და ჟურნალისტი აგრესიის სამიზნე გახდა. ინციდენტი არჩევნების პროცესის გაშუქების დროს, ეზოში მოხდა. ჟურნალისტური საქმიანობის შესრულებისას სულხან მესხიძისთვის ტელეფონის წართმევა და დამტვრევა სცადეს. ადგილზე მყოფი პოლიციელები ჟურნალისტის მიმართ განხორციელებულ აგრესიასა და ტელეფონის წართმევის მცდელობას ხედავდნენ, თუმცა მათ რეაგირება არ მოუხდენიათ. ვიდეოკადრების სრულყოფილად გადაღება ვერ შევძელით, რადგან მობილურის დაზიანების თავიდან არიდების მცდელობისას ჩაწერა შეწყდა.
კავშირის წევრების ნაწილი მიიჩნევს, რომ ორგანიზაციაში მიმდინარე პროცესები უფრო დახურული სისტემის ნიშნებს ატარებს, ვიდრე დემოკრატიული მმართველობის პრინციპებს. მათი თქმით, კითხვები არსებობს როგორც მონაწილეთა მცირე რაოდენობაზე, ისე არჩევნების ორგანიზების ფორმატზეც.
კავშირის კრიტიკულად განწყობილი წევრები აცხადებენ, რომ ციხისძირი არჩევნების ჩასატარებლად მიზანმიმართულად შეირჩა, რათა კენჭისყრის სივრცესთან მაქსიმალურად ნაკლები ადამიანი მისულიყო. მათი თქმით, შენობა ქალაქგარეთ მდებარეობს და იქამდე პირდაპირი, ადაპტირებული ტრანსპორტი არ მოძრაობს.
უსინათლო წევრებს ასევე, აქვთ პრეტენზიები კავშირის კუთვნილი სხვადასხვა ქონების გასხვისების საკითხთან დაკავშირებითაც, რაზეც სასამართლო დავები მიმდინარეობს. მათი შეფასებით, უძრავი ქონების განკარგვა ერთეულების ინტერესების შესაბამისად ხდება.
