პოლიტიკური გაერთიანება პარტია „ახალი“-ის პოლიტსაბჭოს წევრი მირდატ ქამადაძე აცხადებს, რომ პარტიას ტოვებს. შესაბამისი განცხადება მან სოციალურ ქსელში გაავრცელა, სადაც გადაწყვეტილების მიზეზებზე საუბრობს.
ქამადაძის თქმით, პარტიული პროცესებიდან ის უკვე დიდი ხანია დისტანცირებულია და არც შეხვედრებსა და პოლიტსაბჭოს მუშაობაში მონაწილეობდა. მისი განმარტებით, გადაწყვეტილება ემოციური ან პირადი კონფლიქტის შედეგი არ არის და იგი ხედვებს შორის არსებულ „ფუნდამენტურ განსხვავებას“ უკავშირდება.
ქამადაძე თავის პოსტში მიმოიხილავს ბოლო წლების პოლიტიკურ პროცესებსაც, მათ შორის ბათუმის 2021 წლის არჩევნებს, „ერთიანი ნაციონალური მოძრაობაში“ არსებულ შიდა დაპირისპირებებსა და მოგვიანებით პარტია „ახალის“ შექმნას. მისი თქმით, პოლიტიკაში მოსვლის მთავარი მოტივაცია იყო განსხვავებული აზრის მქონე მოქალაქეებთან დიალოგი და რეალური პოლიტიკური იდეის ფორმირება.
პოლიტსაბჭოს ყოფილი წევრი კრიტიკულად აფასებს როგორც შიდა პოლიტიკური კულტურის ხარისხს, ისე ცალკეულ კამპანიებსა და გადაწყვეტილებებს. მათ შორის ის ახსენებს ე.წ. „გირაოს არ გადავიხდით“ კამპანიას, რომელიც მისი შეფასებით, არასწორად წარიმართა და მძიმე შედეგები მოჰყვა მონაწილეებისთვის.
ქამადაძის განცხადებით, პრობლემად რჩება ასევე მართლმსაჯულების სისტემა და ძალაუფლების კონცენტრაციის რისკები, რის შესახებაც, მისი თქმით, პოლიტიკური სპექტრის ნაწილი საკმარისად არ საუბრობს. ის აღნიშნავს, რომ ბუნდოვანი პოლიტიკური ხედვა საზოგადოებაში შიშსა და უნდობლობას აჩენს.
„პარტიას ვტოვებ, მაგრამ იმ იდეას არა, რის გამოც პოლიტიკაში მოვედი“, – წერს ქამადაძე და დასძენს, რომ მომავალში საქმიანობის გაგრძელებას დამოუკიდებელი ფორმით გეგმავს.
