„დინამო ბათუმმა“ გამოცდილი ნიდერლანდელი შემტევი ნახევარმცველი იმრან ულად ომარი დაიმატა. ფეხბურთელთან ხელშეკრულება ერთი წლით გაფორმდა. 28 წლის ფეხბურთელის ტრანსფერის შესახებ თავად კლუბმა გამოაცხადა.
„საფეხბურთო კლუბი „დინამო ბათუმი“ მოხარულია გაცნობოთ, რომ ნიდერლანდელი შემტევი ნახევარმცველი იმრან ულად ომარი კარიერას ჩვენს კლუბში განაგრძობს. ფეხბურთელი გუნდს სომხური ერევნის „ნოადან“ შემოუერთდა და მხარეებს შორის ხელშეკრულება ერთი წლის ვადით გაფორმდა“, – წერია „ბათუმელების“ განცხადებაში.
ულად ომარი „თოლიებს“ სომხური „ნოადან“ შეუერთდა. 2025-2026 წლების სეზონში „FC Noah Yerevan“-ის მაისურით 29 მატჩი ჩაატარა, სადაც რვა გოლი გაიტანა და ოთხი საგოლე გადაცემა შეასრულა.
„ბედნიერი ვარ „დინამო ბათუმში“ გადმოსვლით. საქართველოს ჩემპიონატს კარგად ვიცნობ და ვიცი, რამდენად დიდი ისტორია და როგორი გულშემატკივარი ჰყავს ამ გუნდს. მოუთმენლად ველი ახალ თანაგუნდელებთან შეხვედრას. ჩვენი მიზნები მაღალია. მინდა, გუნდს ტიტულების მოგებაში დავეხმარო და ლამაზი თამაშით ერთგული ქომაგები გავახარო“, – აღნიშნა იმრან ულად ომარმა „დინამო ბათუმის“ პრესსამსახურთან ინტერვიუში.
ომარმა საფეხბურთო კარიერა 2012 წელს ნიდერლანდებში დაიწყო. ნათამაშები აქვს არაერთ ევროპულ კლუბში. ის ასევე ასპარეზობდა „დინამო თბილისსა“ და „თბილისის ლოკომოტივში“.
კარიერის განმავლობაში ის ორჯერ გახდა სომხეთის თასის გამარჯვებული, 2024-25 და 2025-26 წლების სეზონებში. 2024-25 წლების სეზონში ულად ომარი ასევე გახდა სომხეთის ჩემპიონი „ნოასთან“ ერთად. „დინამო თბილისში“ ასპარეზობისას კი ერთგზის საქართველოს ჩემპიონი და საქართველოს სუპერთასის მფლობელი გახდა.
ავტორი: დიმიტრი გორგილაძე
