ბათუმში, ჩოლოყაშვილის ქუჩაზე მდებარე ორსართულიანი სოციალური სახლების სარდაფები წყლით არის სავსე. შენობებში სხვადასხვა სოციალური კატეგორიის მქონე პირები და დევნილები ცხოვრობენ.
როგორც „აჭარა თაიმსს“ მოქალაქეები უყვებიან, წყალი სარდაფებში დიდი ხნის განმავლობაში გროვდება. მათი თქმით, მდგომარეობას განსაკუთრებით ართულებს ის, რომ სარდაფში ელექტროენერგიის მრიცხველებიცაა განთავსებული.
მათი თქმით, შენობაში ნესტის მძაფრი სუნია, ტენიანობის გამო კი საცხოვრებელ ბინებში დაზიანდა კედლები და რემონტი. შექმნილი პირობები კი ჰიგიენის დაცვასაც ართულებს.
„აჭარა თაიმსთან“ საუბრისას მცხოვრებლები ასევე ამბობენ, რომ მათ სხვადასხვა ჯანმრთელობის პრობლემა აქვთ და არსებული საცხოვრებელი პირობები მდგომარეობას კიდევ უფრო ართულებს.
მათი თქმით, პრობლემის შესახებ შესაბამის სამსახურებს არაერთხელ მიმართეს და დახმარება სთხოვეს, თუმცა, ამ დრომდე, პრობლემა არ მოგვარებულა.
