სასაზღვრო პოლიციის ცნობით, საქართველოს სახელმწიფო საზღვრის უკანონოდ გადაკვეთის ფაქტზე უცხო ქვეყნის ოთხი მოქალაქე დააკავეს.
უწყების ინფორმაციით, ორი ბრალდებული სასაზღვრო პოლიციის ბათუმის სამმართველოს „სარფისა“ და „გორგაძეთის“ სექტორების დასაცავ მონაკვეთებზე, სასაზღვრო-საკონტროლო გამტარი პუნქტის გვერდის ავლით, თურქეთიდან საქართველოში სახელმწიფო საზღვრის ქვეითად უკანონოდ გადაკვეთის დროს დააკავეს.
კიდევ ორმა პირმა საქართველოს სახელმწიფო საზღვარი სატვირთო ავტომანქანაში დამალვის გზით გადმოკვეთა და ქვეყანაში უკანონოდ შემოვიდა. გამოძიება საქართველოს სისხლის სამართლის კოდექსის 344-ე მუხლის პირველი ნაწილით მიმდინარეობს, რაც ხუთ წლამდე ვადით თავისუფლების აღკვეთას ითვალისწინებს.
სასაზღვრო პოლიციის ცნობით, დაკავებული ორი პირის მიმართ საიმიგრაციო პროცედურები მიმდინარეობს, რის შემდეგაც მათი ქვეყნიდან გაძევება განხორციელდება.
