მიმდინარე წლის 1 ოქტომბერს ბათუმის სტადიონის საკონფერენციო დარბაზში გაიმართა შეხვედრა აჭარის მთავრობის თავმჯდომრესთან, აჭარის განათლებისა და სპორტის მინისტრთან, მოქმედ სპორტულ ფედერაციების წარმომადგენლებთან და ვეტერან სპორტსმენებთან.
მოხსენებით ბარათში, რომელიც აჭარის სპორტის დეპარტამენტის უფროსს ირმა ნიჟარაძეს ამავე დეპარტამენტის უფროსის პირველმა მოადგილემ ირაკლი კაიკაციშვილმა მისწერა, ნათქვამია:
„შეხვედრა მიზნად ისახავდა სპორტსმენებისა და მწვრთნელების მიღწევების აღნიშვნას. რეგიონის ექვსივე მუნიციპალიტში სპორტის მიმართულებით სამომავლო საჭიროებების საკითხების განხილვას, ასევე სპორტული ტურიზმის განვითარების ხელშეწყობას. აღნიშნული ღონისძიების ფარგლებში მოწვეული 70 სტუმრისათვის მოეწყო ფურშეტი. რომლისთვისაც დაიხარჯა 8200 ლარი.“
ღონისძიების ხარჯები მთლიანად ავტონომიური რესპუბლიკის ბიუჯეტიდან დაფინანსდა. აჭარის სპორტის დეპარტამენტის ფეისბუქგვერის მიერ გავრცელებული ფოტოების თანახმად, შეხვედრას რამდენიმე ცნობილი, მათ შორის, „ქართულ ოცნებასთან“ დაახლოებული, პირი ესწრებოდა.
საგადასახადო ანგარიშფაქტურის თანახმად, „ქეთრინგი“ (გულისხმობს საკვების მომზადებას, ადგილზე მიტანასა და სერვირებას) 8 200 ლარი დაჯდა. ფურშეტი გათვლილი იყო 70 პერსონაზე. გამოდის, რომ ერთ სტუმარზე 117 ლარზე მეტი დაიხარჯა.
