ევროკავშირი 2026 წელს საქართველოში ახალი პროექტების განსახორციელებლად 38 მილიონი ევროს გამოყოფას გეგმავს. პროექტები მოსახლეობის მხარდაჭერას, რეგიონების განვითარებასა და სხვადასხვა სოციალური და ეკონომიკური პრობლემის მოგვარებას ითვალისწინებს.
ევროკავშირის ოფიციალური ვებგვერდის ინფორმაციით, საქართველო-ევროკავშირის პარტნიორობა 30 წელზე მეტს ითვლის. 1992 წლიდან ევროკავშირმა საქართველოში პროგრესის მხარდასაჭერად 2 მილიარდ ევროზე მეტი გამოყო.
ახალი პროექტები რამდენიმე მიმართულებას მოიცავს. მათ შორისაა მცირე ქალაქებსა და დასახლებებში ეკონომიკური შესაძლებლობების შექმნა, პროფესიული უნარების განვითარება და დასაქმების ხელშეწყობა.
ევროკავშირი ასევე გააგრძელებს სოფლად მცხოვრები ქალებისა და საოჯახო ფერმების მხარდაჭერას. დაგეგმილია ფერმერებისთვის შემოსავლის გაზრდის შესაძლებლობების შექმნა, ადგილობრივი პროდუქციისთვის ახალი ბაზრების ხელშეწყობა და სურსათის უვნებლობისა და ხარისხის გაუმჯობესება.
პროექტების ნაწილი ქალებისა და გოგონების მიმართ ძალადობის პრევენციას, ძალადობის მსხვერპლთათვის სერვისებზე ხელმისაწვდომობის გაუმჯობესებასა და მათი ეკონომიკური შესაძლებლობების გაფართოებას დაეთმობა.
ევროკავშირი ასევე გეგმავს ბუნებრივი კატასტროფების რისკების შემცირებას, განსაკუთრებით სოფლის, მთიანი და მაღალი რისკის მქონე დასახლებებში. ამ მიზნით ადგილობრივ თემებს საგანგებო სიტუაციების სამოქმედო გეგმების შემუშავებასა და მოხალისეების მომზადებაში დაეხმარებიან.
დახმარების მიმართულებებს შორისაა გარემოს დაცვა, კლიმატის ცვლილებებთან ადაპტაცია, ენერგოეფექტური ტექნოლოგიების ხელშეწყობა და უსაფრთხო მიგრაციის მხარდაჭერაც.
ევროკავშირის განცხადებით, საქართველოში დემოკრატიული უკუსვლის გამო ის საქართველოს ხელისუფლებას ფინანსურ მხარდაჭერას აღარ უწევს, თუმცა ქვეყნის მოსახლეობის დახმარებას განაგრძობს.
