“ქართული ოცნება” საჯარო მოხელეების პოლიტიკური ნიშნით დევნას აგრძელებს, ამბობენ პარტია “ლელოში” და ამის მაგალითად დავით დევაძეს ასახელებენ, რომელსაც ხელვაჩაურის მერიამ ხელშეკრულება შეუწყვიტა. სასპორტო სკოლის მწვრთნელს გათავისუფლების ოფიციალურ მიზეზად, როგორც თავად ამბობს, ფინანსური კრიზისი დაუსახელეს.
დავით დევაძეს მიაჩნია, რომ მისთვის ხელშეკრულების შეწყვეტა პოლიტიკურ მოტივს უკავშირდება, რადგან ის ოპოზიციურად განწყობილია, რასაც მუნიციპალიტეტში ვერ ეგუებოდნენ.
“ბავშვების აღზრდისა და სპორტის ამ სახეობის განვთარებისთვის ელემენტარული პირობებიც არ მქონდა. ხშირად გამოვხატავდი უკმაყოფილებას არსებული მდგომარეობის გამო. არ გვქონდა ბურთები, საპირფარეშოები, სასპორტო აღჭურვილობა და ა.შ. მიუხედავად ამისა, მაინც კარგ შედეგებს ვაჩვენებდით. ერთ-ერთი ტურნირის ორგანიზებაში “ლელო” დამეხმარა, მაჩუქეს შესაბამისი ფორმები, აღჭურვილობა და ბავშვებს დავურიგე, რაც არ მაპატიეს. ასევე, პარტიის ყრილობაზე ვიყავი რამდენჯერმე. ჩემი გათავისუფლება სწორედ პოლიტიკურ აქტივობებს უკავშირდება,” – განაცხადა ბრიფინგზე დავით დევაძემ.
პარტია “ლელოში” დღეს გამართულ ბრიფინგზე განაცხადეს, რომ ოპონენტების პოლიტიკური ნიშნით დევნის მორიგ ფაქტზე სამართლებრივ რეაგირებას მოახდენენ.
“ოცნება აგრძელებს ოპონენტების პოლიტიკური ნიშნით დასჯას. ხელვაჩაურის მერიამ ხელშეკრულება შეუწყვიტა ადამიანს, რომელმაც მრავალი თაობა აღზარდა და ის არის სპორტის დამსახურებული მოღვაწე. მმართველმა პარტიამ გადაწყვიტა, რომ ეს ადამიანი არის მისთვის მიუღებელი და მოიშორა. ჩვენ აუცილებლად მოვახდენთ სამართლებრივ რეაგირებას ამ ფაქტზე, სარჩელი უკვე მზადაა და მივმართავთ სასამართლოს,” – ამბობს გენო თებიძე, “ლელოს” ბათუმის ორგანიზაციის ხელმძღვანელი.
“ლელოში” იმასაც ამბობენ, რომ ეს არ არის პირველი შემთხვევა, როცა პარტიის მხარდამჭერებს საჯარო სამსახურებიდან პოლიტიკური ნიშნით ათავისუფლებენ. 2021 წლის მარტში ბათუმის საბავშვო ბაღების გაერთიანებიდან გაათავისუფლეს ზიმლარ ბერიძე, რომლის სასამართლო დავა ამ დრომდე გრძელდება.
