მეწარმეები ხელვაჩაურის მერიას იმ გადასახადების განულებას სთხოვენ, რაც პანდემიისას ვერ დაფარეს.
კერძოდ, სარფის საბაჟოს მიმდებარედ დასაქმებულების თქმით, შემცირებული შემოსავლებისა და მეტწილად უმუშევრობის გამო, იჯარის გადასახადი ვერ შეიტანეს.
თვითდასაქმებულები ამბობენ იმასაც, რომ სამი წლის განმავლობაში ხელისუფლებას მათთვის იჯარის საფასური არ მოუთხოვია, რის გამოც ჩათვალეს რომ გადასახადი დროებით შეჩერებული იყო.
იმ შემთხვევაში თუ მათი მოთხოვნები არ იქნება დაკმაყოფილებული 35-მდე მეწარმე საქართველო თურქეთის დამაკავშირებელი გზის ბლოკირებით იმუქრება.
მეწარმეების პროტესტს ხელვაჩაურის მერიაში წერილობით უპასუხეს.
“სარფის ცენტრში მდებარე საზოგადოებრივი ცენტრის შენობაში განთვასებულ 32 ერთეულ კომერციულ ფართში 2019 წლის დეკემბრიდან, მუნიციპალიტეტმა საიჯარო ხელშეკრულებების საფუძველზე აღნიშნული ფართები დროებით სარგებლობაში გასცა.
საიჯარო ხელშეკრულებებს დღეის მდგომარეობით გასული აქვს ვადები, თუმცა მოიჯარეები, მაინც სარგებლობენ აღნიშნლი ფართებით.
ხელვაჩაურის მუნიციპალიტეტის მერიის მხრიდან არაეთი გაფრთხილების მიუხედავად, ფართების უკანონოდ მოსარგებლეებმა არც ფართები დაცალეს და არც სარგებლობის თანხები არ გადაიხადეს.
აღსანიშნავია ის გარემოებაც, რომ ხელვაჩაურის მუნიციპალიტეტის საკრებულოს 2020 წლის 29 მაისის N07 განკარგულებით და ხელვაჩაურის მუნიციპალიტეტის მერის 2020 წლის 7 ივლისის N933 ბრძანებით კორონავირუსთან დაკავშირებით მოიჯარეებს შეუმცირდათ 2020 წლის გადასახდელი თანხები.
ამ დროისთვის არსებულ ფართებზე გამოცხადებულია ელექტრონული აუქციონი,” – წერია მერიის მიერ მოწოდებულ ინფორმაციაში.
