არ წამოეგოთ პროვოკაციას, რომლის თანახმადაც წინასაარჩევნოდ ადამიანებს პირადობის მოწმობები უნდა ჩამოართვან, ამის შესახებ მეზღვაურთა კლუბის მიმართვაში წერია, რომელსაც ისინი წერილობით ავრცელებენ.
“ნაკლებად გვეგულება ადამიანი ან პროფესია, რომელმაც მეზღვაურზე უკეთ იცის, რა არის თავისუფლება და რამდენად მძიმეა მისი შეზღუდვა. დღეს საქართველო გასაყარზეა. ან უნდა დავკარგოთ მოპოვებული თავისუფლება და ისევ მარწუხებში გავზარდოთ შვილები, ან გავაგრძელოთ სწრაფი განვითარება.
უნდა გვახსოვდეს, რომ თავისუფლება არ არის მხოლოდ ჯაჭვებიდან თავის დახსნა. თავისუფლება არის ცხოვრება ისე, რომ პატივი ვცეთ და სხვათა თავისუფლება გავაძლიეროთ. ჩვენი არა მხოლოდ სურვილი, არამედ ვალდებულებაა – გავაძლიეროთ შვილების, ოჯახების, ქვეყნის თავისუფლება. ბიძინა და ქართული ოცნებით შენიღბული რუსული ჭირი წლებია ცდილობს გადაყრილი ბორკილები ისევ დაგვადოს და მომავალი მოგვისპოს. ამას ვერ დავუშვებთ!
მეზღვაურის ერთ-ერთი მთავარი იარაღი სიმამაცეა. ტალღა თუ ვერ გვაშინებს, რომელიმე პოლიტიკური გუნდი, თუნდაც მმართველო – არაფერია. არის ხმები, რომ პირადობებს ჩამოგართმევენ, დაგაშანტაჟებენ, დაგემუქრებიან… ვერ და არ! პირადობის მოწმობა თავისუფლების ერთ-ერთი სიმბოლოა და არაფრით არ უნდა გადასცეთ სხვა პირს. არც თქვენი ხმა დაუთმოთ ვინმეს! არჩვენებზე არწამსვლელი სწორედ ამას გააკეთებს და ეს დანაშაულიცაა თაობათა წინაშე.
არჩევნები არაა მხოლოდ ხმის მიცემა. ეს მომავლის გზაა და ამ გზაზე არ უნდა დაგვავიწყდეს, რომ თავისუფლების მთავარი გამოხატულება სწორედ არჩევანის ქონა და გამოყენებაა. წადით ყველა არჩევნებზე! ჩვენ ვერ გაიძულებთ და ვერც მოგიწოდებთ, რომელი პარტია გააფერადოთ. მიეცით ხმა ნებისმიერს რუსული და ქოცური გავლენის გარდა! დიახ, ბიძინა უნდა მოიშოროს, საქართველომ! თავისუფალი საქართველო კი, თქვენ ხართ და თქვენი ოჯახები,” – წერია მეზღვაურების მიმართვის ტექსტში.
ინფორმაციისთვის: მეზღვაურთა კლუბის წევრების შეხვედრა 16 ოქტომბერს გაიმართა.
