აჭარის მაუწყებელი ყველა იმ გადაცემას აჩერებს დროებით, რომლებიც პირდაპირ ეთერში მაუწყებლობდნენ, მათ შორისაა პოლიტიკურ-საზოგადოებრივი პროგრამები. ტელევიზიის მენეჯმენტის გადაწყვეტილებას საზოგადოების მწვავე რეაქცია მოჰყვა.
ტელეკომპანიის შენობის წინ ხალხმრავალი აქცია გაიმართა, რომლის შემდეგაც მენეჯმენტს ულტიმატუმი წაუყენეს. პირდაპირი ეთერისა და შეჩერებული გადაცემების აღდგენის მოთხოვნით ვლადიმეტ ტატიშვილთან შეხვედრა გაიმართა, თუმცა მხარეებმა მისგან კონკრეტული პასუხი და პოზიცია ვერ მოისმინეს. ვლადიმერ ტატიშვილი არც მომიტინგეებს შეხვდა, რისი დაჟინებული მოთხოვნაც ჰქონდათ.
ცნობისთვის: დირექტორსა და მესამე სექტორს შორის გამართული შეხვედრით უკმაყოფილო ადამიანებმა განაცხადეს, რომ მანამ არ დაიშლებოდნენ, ვიდრე მოთხოვნები არ დაკმაყოფილდებოდა. ხმაურისა და სკანდირების შემდეგ, სპეცეთერის მეშვეობით პოლიტიკოსებსა და მოქალაქეებს აზრის გამოხატვის შესაძლებლობა მიეცათ.
ინფორმაციისთვის: დღეს, საზოგადოებრივი მაუწყებლის აჭარის ტელევიზიისა და რადიოს ადმინისტრაციამ მიიღო გადაწყვეტილება და დღის განმავლობაში, საინფორმაციო ბადეში დაგეგმილი, პირდაპირ ეთერში მიმდინარე ყველა გადაცემა შეაჩერა, გარდა საინფორმაციო გამოშვებისა.
“მეგობრებო, ხუთშაბათს, 21:00-ზე ვეღარ შეგხვდებით აჭარის ტელევიზიის პირდაპირ ეთერში. ბოდიშს გიხდით, რომ უკვე ვერ შემოგთავაზებთ განსხვავებულ მოსაზრებებს, კრიტიკულ აზრს, საქართველოს ევროპული მომავლისთვის მებრძოლი ადამიანების ანალიზს… ბოდიში, რომ კონსტიტუციის დაცვის საშუალება ამჯერად არ მეძლევა… ბოდიში, რომ ვეღარ ვიცავ კანონს “მაუწყებლობის შესახებ” და ვეღარ ვასრულებ ვალდებულებებს, რომელიც პირველ რიგში, საზოგადოების ინტერესების გათვალისწინებას გულისხმობს… ბოდიში, რომ ამ კვირის ხუთშაბათს პირდაპირი ეთერიდან უკვე ვერ გეტყვით, რომ რუსეთი ოკუპანტია; რომ მიუღებელია ძალადობა მედიაზე, საკუთარ მოქალაქეებზე, ახალგაზრდებზე; გადაცემა “სათქმელის” და სხვა გადაცემების გაჩერების საბოლოო გადაწყვეტილება მიიღო და დღეს პირისპირ შეხვედრისას დამიდასტურა დირექტორმა – ლადო ტატიშვილმა. ვფიქრობ, რომ ახლა როგორც არასდროს, უნდა მოვიკრიბოთ პროფესიონალიზმი და საზოგადოებას კი არ დავემალოთ, არამედ, ყველა გადაცემიდან ველაპარაკოთ სიმართლეზე და რისკებზე. გაჩერებულია ყველა გადაცემა, რომელიც პირდაპირ ეთერში გადაიცემოდა. მუშაობს მხოლოდ საინფორმაციო სამსახური და საინფორმაციო გამოშვება. რა იქნება მომავალ კვირას ან ზოგადად – მომავალში, გაურკვეველია,” – დაწერა სოციალურ ქსელში ირინა ყურუამ.
