აჭარის საზოგადოებრივი მაუწყებლის პირდაპირ ეთერში შემთხვევით გავიდა წამყვან ქეთი ბოლქვაძისა და უცნობი კაცის კერძო საუბარი. კადრების პარალელურად ხმის ეთერში გაპარვისას ბოლქვაძე აფასებს ჟურნალისტ ეთერ თურაძის პირდაპირ ეთერამდე სტუდიაში შესვლის ფაქტს.
პირდაპირ ეთერში კი ბოლქვაძემ საპირისპირო რამ თქვა. მან რამდენჯერმე გააკრიტიკა ეთერ თურაძე, მას დასდო „შემოვარდნის“ ბრალი და აღნიშნა, რომ ჟურნალისტის ქცევა ხელს უშლიდა მის მუშაობას. თუმცა, როგორც ეთერში გაპარული ხმიდან ირკვევა, კერძო საუბარში ბოლქვაძე აღიარებს, რომ თურაძეს რეალურად ხელი არ შეუშლია, მაგრამ მისი იქ ყოფნა „დამძაბველ და დამთრგუნველ“ გარემოს ქმნიდა.
გარდა ამისა, ჩანაწერში ქეთევან ბოლქვაძე ახსენებს ჟურნალისტ გიგა გელხვიიძეს და მის მიმართ ჰომოფობიური ტერმინოლოგიას იყენებს, რაც საზოგადოების ნაწილში განსაკუთრებული კრიტიკის მიზეზი გახდა.
ინციდენტის შემდეგ მაუწყებელზე და მის თანამშრომლებზე საზოგადოებრივი ყურადღება გაიზარდა. ბოლქვაძის ჰომოფობიური გამონათქვამები და თურაძესთან დაკავშირებით მისი საჯარო და კერძო შეფასებები აქტიური განხილვის საგანია სოციალურ ქსელში.
ქეთი ბოლქვაძეზე პასუხისმგებლობის დაკისრების ნაცვლად, აჭარის მაუწყებელი წამყვანის ქმედებას, ფომოფობიური საუბრის ნაწილზე, ემოციურობით ხსნის. განცხადება, რომელიც მაუწყებელმა გაავრცელა არაფერი წერია ჟურნალისტის მხრიდან მიზანმიმართულ ტყუილზე.
”საზოგადოებრივი მაუწყებლის აჭარის ტელევიზია და რადიო ემიჯნება ჰომოფობიის ნებისმიერი ფორმით გამოხატვას. გამოშვება “მთავარის” წამყვანი იმყოფებოდა მძიმე ფსიქო-ემოციურ მდგომარეობაში, რაც გამოწვეული იყო იმით, რომ გამოშვების მიმდინარეობისას სტუდიაში უნებართვოდ იმყოფებოდა გარეშე პირი (ეთერ თურაძე რომელიც უნებართვოდ შემოვიდა მაუწყებლის შენობაში), რომელსაც ჩართული ჰქონდა ფეისბუქ ლაივი, რასაც მოჰყვა წამყვანის მიმართ აგრესია სოციალურ ქსელში, რაც გახდა მისი აღელვების მიზეზი. ჩვენ ბოდიშს ვიხდით აღნიშნულის გამო და კიდევ ერთხელ ვაფიქსირებთ, რომ ვემიჯნებით ჰომოფობიის ნებისმიერი ფორმით გამოვლინებას”. – წერია აჭარის ტელევიზიის განცხადებაში.
ინფორმაციისთვის: პირდაპირი ეთერის მოთხოვნით აჭარის მაუწყებელთან მორიგი აქცია გუშინ ღამით გაიმართა.
პირდაპირი ეთერის მოთხოვნით აჭარის მაუწყებელთან მორიგი აქცია გაიმართა
