ბათუმში, თამარის დასახლებაში მდებარე N34 საბავშვო ბაღი დაიკეტა. დღეს სკოლამდელმა დაწესებულებამ ბავშვები აღარ მიიღო. მიზეზი შენობაზე გაჩენილი ბზარები გახდა.
„მოგესალმებით, საბავშვო ბაღში კედელზე გაჩენილი ბზარების გამო ვიწყებთ სარემონტო სამუშაოებს, ამიტომ ბავშვების უსაფრთხოების მიზნით, გთხოვთ, სადილის შემდეგ, ორი საათისთვის მოაკითხეთ ბავშვებს. სამხარაულიდან ველოდებით დასკვნას, წინასწარ არაფერი ვიცით ჯერ. მაგრამ ამ ეტაპზე სააღმზრდელო პროცესი შეჩერებულია ჩვენი უსაფრთხოების მიზნით,“ – ასეთი შეტყობინება მიიღეს მშობლებმა ადმინისტრაციისგან.
ინფორმაციისთვის: 6 წლის წინ, საბავშვო ბაღის მშენებლობისთვის ქალაქის ბიუჯეტს დაახლოებით 1 მილიონ 650 ათასი ლარი დაიხარჯა. ბაღი 210 აღსაზრდელზეა გათვლილი.
ცნობისთვის: “აჭარა თაიმსი” დამატებითი დეტალების გასარკვევად საბავშვო ბაღის გამგეს დაუკავშირდა, თუმცა თამარ ნაგერვაძემ კითხვებზე არ გვიპასუხა და ტელეფონი გაგვითიშა.
