სახელმწიფო საზღვრის უკანონოდ გადაკვეთისა და ცეცხლსასროლი იარაღის მართლსაწინააღმდეგო შეძენა-შენახვის ბრალდებით უცხო ქვეყნის მოქალაქე, 2006 წელს დაბადებული გ.შ. დააკავეს.
გამოძიების ინფორმაციით, ბრალდებულმა, სასაზღვრო-საკონტროლო გამტარი პუნქტის გვერდის ავლით, თურქეთის რესპუბლიკიდან საქართველოს მიმართულებით უკანონოდ გადმოკვეთა სახელმწიფო საზღვარი. სამართალდამცველებმა გ.შ.-ს პირადი ჩხრეკისას ნივთმტკიცების სახით ამოიღეს ცეცხლსასროლი იარაღი, მჭიდი და 16 ცალი ვაზნა. დამატებით, მისი დროებითი საცხოვრებელი ბინიდან ამოღებულია კიდევ ერთი საბრძოლო ვაზნა.
საქმეზე გამოძიება მიმდინარეობს საქართველოს სისხლის სამართლის კოდექსის 344-ე მუხლის პირველი ნაწილითა (სახელმწიფო საზღვრის უკანონო გადაკვეთა) და 236-ე მუხლის მესამე ნაწილით (ცეცხლსასროლი იარაღის მართლსაწინააღმდეგო შეძენა და შენახვა), რაც სასჯელის სახით ექვს წლამდე თავისუფლების აღკვეთას ითვალისწინებს. შინაგან საქმეთა სამინისტრო აცხადებს, რომ სამართალდარღვევებზე რეაგირება მკაცრია და კანონის ფარგლებში გაგრძელდება გამოძიება.
