საკრუიზო ლაინერი Astoria Grande 28 მაისს კვლავ დაუბრუნდება ბათუმის ნავსადგურს. გემის ოფიციალურ ვებგვერდზე არსებული ინფორმაციის მიხედვით, სოჭიდან დაწყებული მარშრუტი 26 მაისს ამოქმედდება და წლის ბოლომდე შავი ზღვის მიმართულებით 10 კრუიზის შესრულებაა დაგეგმილი.
ცნობისთვის, „Astoria Grande“-ს ბათუმში გამოჩენა 2023–2024 წლებში საზოგადოების პროტესტის ფონზე მიმდინარეობდა, რის შემდეგაც გემმა დროებით შეწყვიტა საქართველოს მიმართულებით ოპერირება.
საპირისპიროს ამტკიცებენ საზღვაო ტრანსპორტის სააგენტოში.
„გავრცელებული ინფორმაცია, თითქოს ბათუმის პორტში „რუსული საკრუიზო გემი Astoria Grande ბრუნდება“, არ შეესაბამება სიმართლეს და წარმოადგენს საზოგადოების შეცდომაში შეყვანის მცდელობას. ხაზგასმით ვაცხადებთ, რომ ბათუმის ნავსადგურში აღნიშნული გემის შემოსვლასთან დაკავშირებით არ არსებობს არც დადასტურებული განაცხადი და არც რაიმე შემოსვლის განაცხადი მუშავდება. მსგავსი ტიპის დაუზუსტებელი და ემოციურად მანიპულაციური განცხადებები მიზანმიმართულად ვრცელდება საზოგადოებაში დაძაბულობისა და სპეკულაციების შესაქმნელად. საქართველოს საზღვაო სფეროში მოქმედი ყველა პროცედურა ხორციელდება მოქმედი კანონმდებლობის, საერთაშორისო ვალდებულებების, უსაფრთხოების, სასაზღვრო და სანქციებთან შესაბამისობის მოთხოვნების სრული დაცვით. მოვუწოდებთ ყველა დაინტერესებულ პირს, თავი შეიკავონ გადაუმოწმებელი ინფორმაციის გავრცელებისგან და დაეყრდნონ მხოლოდ ოფიციალურ წყაროებს,“ – წერია სააგენტოს განცხადებაში.
