აჭარის უმაღლესი საბჭოს თავმჯდომარემ თანამდებობა დატოვა – ამის შესახებ ბრიფინგზე დავით გაბაიძემ განაცხადა.
„მსურს, განვაცხადო აჭარის ავტონომიური რესპუბლიკის უმაღლესი საბჭოს თავმჯდომარის პოსტიდან ჩემი გადადგომის შესახებ. ბევრისთვის ეს ფაქტი უკვე ცნობილია პრაქტიკულად, თუმცა სამართლებრივი პროცედურაა, რომ ეს განცხადება უნდა გაკეთდეს. ვაფიქსირებ ჩემს ამ პოზიციას.
გადადგომის განცხადებასთან ერთად მინდა, მადლობა ვუთხრა „ქართული ოცნების“ გუნდს. სამი მოწვევის განმავლობაში არასრული 10 წელი ვხელმძღვანელობდი ამ მნიშვნელოვან ინსტიტუციას, ვემსახურე ხალხს, როგორც შემეძლო. ძალები არ დამიზოგავს. მადლობა მინდა ვუთხრა განსაკუთრებით პარტიის დამფუძნებელს, ბიძინა ივანიშვილს, პრემიერ-მინისტრ ირაკლი კობახიძეს, პრეზიდენტს, საქართველოს პარლამენტის თავმჯდომარეს, მთავრობის წევრებს“, – განაცხადა დავით გაბაიძემ ბრიფინგზე.
დავით გაბაიძე საბჭოს ზედიზედ, სამჯერ ხელმძღვანელობდა.
მედიაში გავრცელებული ინფორმაციის თანახმად, დავით გაბაიძეს სავარაუდოდ, ცოტნე ანანიძე ჩაანაცვლებს.
