შინაგან საქმეთა სამინისტროს ინფორმაციით, საგამოძიებო მოქმედებების შედეგად, უკრაინის მოქალაქეები – 1981 წელს დაბადებული მ.ზ. და წარსულში ნასამართლევი, 1987 წელს დაბადებული შ.ყ. – დიდი ოდენობით ქონების მიღების მიზნით ჯგუფურად ჩადენილი გამოძალვისა და იძულების ბრალდებით დააკავეს.
გამოძიებით დადგინდა, რომ ბრალდებულებმა ბათუმში მცხოვრებ უკრაინის მოქალაქეს, 1994 წელს დაბადებულ მ.ჰ.-ს, უკრაინაში მიმდინარე ერთ-ერთ სისხლის სამართლის საქმეზე ჩვენების შეცვლა მოსთხოვეს. მათი მოთხოვნა ასევე მოიცავდა 180 000 აშშ დოლარის გადარიცხვას იმ პირების სასარგებლოდ, რომლებიც აღნიშნული საქმის ფარგლებში იყვნენ დაკავებულნი. წინააღმდეგ შემთხვევაში, ბრალდებულები მ.ჰ.-ს და მის მეუღლეს სიცოცხლის მოსპობით დაემუქრნენ.
“სამართალდამცველებმა შ.ყ. ბათუმში დააკავეს, ხოლო მ.ზ. – სარფის სასაზღვრო გამშვები პუნქტის ტერიტორიაზე, საქართველოს დატოვების მცდელობისას. საქმეზე გამოძიება საქართველოს სისხლის სამართლის კოდექსის 181-ე მუხლის მე-2 ნაწილით (გამოძალვა) და 150-ე მუხლის მე-2 ნაწილით (იძულება) მიმდინარეობს, რაც სასჯელის სახით 7 წლამდე ვადით თავისუფლების აღკვეთას ითვალისწინებს,” – წერია უწყების მიერ გავრცელებულ ინფორმაციაში.
