ევროპისა და ჩრდილოეთ ამერიკის 37-მა ქვეყანამ ეუთო-ს ერთობლივი განცხადებით მიმართა და საქართველოში ადამიანის უფლებების მდგომარეობის გაუარესების გამო შეშფოთება გამოხატა.
განცხადებაში ხაზგასმულია, რომ ბიძინა ივანიშვილის კონტროლირებადი პარლამენტის მიერ მიღებულმა რეპრესიულმა საკანონმდებლო ცვლილებებმა საქართველოს დემოკრატიული განვითარება მნიშვნელოვნად შეაფერხა.
ინფორმაციისთვის: განცხადებას ხელს აწერს: გერმანია, ალბანეთი, ავსტრია, ბელგია, ბოსნია და ჰერცეგოვინა, ბულგარეთი, კანადა, ხორვატია, კვიპროსი, ჩეხეთი, დანია, ესტონეთი, ფინეთი, საფრანგეთი, საბერძნეთი, ისლანდია, ირლანდია, იტალია, ლატვია, ლიხტენშტაინი, ლიეტუვა, ლუქსემბურგი, მალტა, მონტენეგრო, ნიდერლანდები, ჩრდილოეთ მაკედონია, ნორვეგია, პოლონეთი, პორტუგალია, მოლდოვა, რუმინეთი, სლოვენია, ესპანეთი, შვედეთი, შვეიცარია, გაერთიანებული სამეფო და უკრაინა.
“შეშფოთებას გამოვთქვამთ რამდენიმე ძირითად საკითხზე: სამოქალაქო სივრცის საკანონმდებლო შეზღუდვაზე, დამოუკიდებელი მედიის მიზანში ამოღებაზე, პოლიციის მიერ ძალის გადაჭარბებული გამოყენების საკითხზე, ანგარიშვალდებულების არარსებობასა და მშვიდობიანი დემონსტრანტების წინააღმდეგ არაიდენტიფიცირებადი ჯგუფების მიერ არაპროპორციული ძალადობის შესახებ – ასევე, წინასწარი პატიმრობის ზედმეტად ხანგრძლივ პერიოდებსა და წინასწარი პატიმრობის ქვეშ მყოფთა პირთა მიმართ არასათანადო მოპყრობის შესახებ გავრცელებულ ინფორმაციებზეც. უცხოური აგენტების რეგისტრაციის შესახებ კანონი ავალდებულებს ყველა ინდივიდსა და ორგანიზაციას, რომელიც უცხოურ დაფინანსებას იღებს რეგისტრირდნენ, როგორც “უცხოელი აგენტები” – წინააღმდეგ შემთხვევაში მათ, ვინც აღნიშნულზე უარს იტყვის, შესაძლოა ფინანსური სანქცია ან სისხლის სამართლებრივი სასჯელი დაეკისროს.
აღნიშნული კანონპროექტი სხვა ბოლო დროს მიღებულ საკანონმდებლო ცვლილებებთან ერთად, ზღუდავს სამოქალაქო საზოგადოების ორგანიზაციებსა და ადამიანების უფლებათა დამცველებს – ამ კანონს არ გააჩნია სამართლებრივი გარანტიები, ის მიმართულია სამოქალაქო საზოგადოების, მედიისა და კერძო პირების, როგორც უცხოური გავლენის ინსტრუმენტების ბრენდირებაზე, რომელიც მხოლოდ და მხოლოდ დაფინანსების წყაროებზეა დაფუძნებული, რაც მტკიცედ მიუთითებს, რომ ეს კანონი არა გამჭვირვალობას ეხება, არამედ განსხვავებული აზრის ჩახშობას და სამოქალაქო საზოგადოებაზე ზეწოლის გამკაცრებას – ეს განსაკუთრებით შემაშფოთებელია მოახლოებული ადგილობრივი არჩევნების გათვალისწინებით. ჩვენ ასევე დეტალურად ვახდენთ ბოლოდროინდელი საკანონმდებლო ცვლილებების მონიტორინგს საქართველოს საარჩევნო კანონმდებლობაში – აუცილებელია, რომ საარჩევნო კანონმდებლობაში ნებისმერი ცვლილება იყოს გამჭვირვალე და საზოგადოებრივი ნდობიდან გამომდინარე. ჩვენ შეშფოთებას გამოვთქვამთ საკანონმდებლო ცვლილებების მიმართ, რომელიც ძირს უთხრის მშვიდობიანი შეკრების თავისუფლებასაც.
აღნიშნული საკანონმდებლო ცვლილებები ძირს უთხრის თანაბარი საარჩევნო უფლების პრინციპს და ზღუდავს შეკრების თავისუფლებას, როგორც აღნიშნულია ODIHR-ისა და ვენეციის კომისიის ბოლო ანგარიშებში – ჩვენ მოვუწოდებთ საქართველოს ხელისუფლებას შეასრულოს მათი რეკომენდაციები. მიუხედავად საქართველოს მიერ განმეორებით გაკეთებული განცხადებებისა, რომლითაც კიდევ ერთხელ დაადასტურდა დიალოგისადმი მოწოდება და ეუთო-ს პრინციპები და ვალდებულებები, ჩვენ ჯერ კიდევ ვერ ვხედავთ კონკრეტულ და ნამდვილ ნაბიჯებს აზრიანი ჩართულობისკენ.
სამაგიეროდ, საქართველოს ხელისუფლების მიერ ბოლო დროს განხორციელებულმა ქმედებებმა საქართველო კიდევ უფრო დაშორა დემოკრატიას – ჩვენ მოვუწოდებთ საქართველოს ხელისუფლებას, დაიწყოს ინკლუზიური დიალოგი ყველა პოლიტიკურ პარტიასთან და სამოქალაქო საზოგადოების ორგანიზაციებთან, რათა მოძებნონ მიმდინარე კრიზისის მშვიდობიანი და დემოკრატიული გადაწყვეტა. ჩვენი ურყევი მხარდაჭერა და ერთგულება საქართველოს სუვერენუობისა და ტერიტორიული მთლიანობის მიმართ უცვლელი რჩება – ჩვენ მტკიცედ ვუჭერთ მხარს ქართველი ხალხსა და მათ მისწრაფებას დემოკრატიული, სტაბილური და ევროპული მომავლისკენ და მზად ვართ ვითანამშრომლოთ საქართველოსთან, რათა უზრუნველვყოთ მისი საერთაშორისო ვალდებულებების შესრულება და ადამიანის უფლებებისა და ფუნდამენტური თავისუფლებების სრული პატივისცემა”. – აღნიშნულია განცხადებაში.
