ფოტო: ხათუნა ბერიძე
ბათუმის ბულვარში ავტომობილების გადაადგილების ფაქტთან დაკავშირებით ზღვისპირა პარკის ადმინისტრაცია ინფორმაციას ავრცელებს და განმარტავს, რომ სამართალდარღვევის შესახებ შესაბამის უწყებებს უკვე აცნობეს. ადმინისტრაციის განმარტებით, ფაქტი დაფიქსირდა შესაბამისი სამსახურის მიერ, რის შემდეგაც ინფორმაცია შინაგან საქმეთა სამინისტროს გაეგზავნა.
მათივე ცნობით, პოლიციელებმა დაადგინეს როგორც ავტომობილების, ისე დამრღვევი პირების ვინაობა და მათ მიმართ კანონით გათვალისწინებული ღონისძიებები გაატარეს.
„ბათუმის ბულვარის ტერიტორიაზე ავტომობილების გადაადგილების ფაქტთან დაკავშირებით განვმარტავთ, რომ შესაბამისი სამსახურის მიერ მოხდა სამართალდარღვევის დაფიქსირება. ინფორმაცია გადაეგზავნა შინაგან საქმეთა სამინისტროს, რომლის მიერაც იდენტიფიცირებულ იქნა ავტომობილები და დამრღვევი პირები. ყველა მათგანი ადმინისტრაციულად დაჯარიმდა,“ – აღნიშნულია ადმინისტრაციის წერილობით კომენტარში.
შეგახსენებთ, რომ რამდენიმე დღის წინ სოციალურ ქსელში გავრცელდა ვიდეო, სადაც ჩანს, რომ როგორც მსუბუქი, ისე სატვირთო ავტომობილები ბათუმის ბულვარის რეკრეაციულ ზოლსა და პრომენადზე გადაადგილდებოდნენ. კადრები მოქალაქე ხათუნა ბერიძემ გადაიღო. გავრცელებული ინფორმაციით, ავტომობილები სავარაუდოდ ერთ-ერთი რესტორნის სტუმრების მომსახურებას უკავშირდებოდა.
