ბათუმი-სარფის 11.3 კილომეტრიანი ახალი გზის მშენებლობის შესახებ ხელშეკრულებას ხელი მოეწერა. ამის შესახებ საქართველოს საავტომობილო გზების დეპარტამენტი აცხადებს.
ხელშეკრულების გაფორმების ცერემონია საქართველოს ინფრასტრუქტურის სამინისტროში გაიმართა. პროექტს საერთაშორისო ტენდერში გამარჯვებული ჩინური კომპანია China Railway Tunnel Group Co., Ltd (CRTG) განახორციელებს.
პროექტის ფარგლებში აშენდება:
- 11.3 კმ სიგრძის ორზოლიანი მაგისტრალური გზა;
- 7.6 კმ სიგრძის საავტომობილო გვირაბი;
- 3 ხიდი, მათ შორის 1.47 კმ სიგრძის სახიდე გადასასვლელი;
- ზღვის ნაპირის დამცავი 500-მეტრიანი ნაგებობა;
ბათუმი-სარფის 7.6 კმ-იანი გვირაბი საქართველოში სიგრძით მეორე ყველაზე გრძელი საავტომობილო გვირაბი იქნება ქვეშეთი–კობის მთავარი გვირაბის შემდეგ.
ახალი გზა ბათუმის შემოვლით მაგისტრალს საქართველოსა და თურქეთის საზღვართან დააკავშირებს. მისი დასრულების შემდეგ საერთაშორისო და სატრანზიტო მოძრაობა აჭარის მჭიდროდ დასახლებული და საკურორტო ზღვისპირა ზოლიდან ახალ მაგისტრალზე გადაერთვება.
საავტომობილო გზების დეპარტამენტის განცხადებით, ეს მნიშვნელოვნად განტვირთავს არსებულ ბათუმი-სარფის გზას და საკურორტო ზონას, გაზრდის მოძრაობის უსაფრთხოებას და გააუმჯობესებს გადაადგილების პირობებს.
პროექტის ღირებულება 809 მილიონ ლარზე მეტია, მშენებლობის ვადა კი 48 თვეა. პროექტი აზიის განვითარების ბანკის სესხისა და საქართველოს სახელმწიფო ბიუჯეტის თანადაფინანსებით განხორციელდება.
ბათუმი-სარფის ახალი გზა აღმოსავლეთ-დასავლეთის მაგისტრალური დერეფნის დასავლეთის ბოლო მონაკვეთი იქნება და შუა დერეფნის სატრანსპორტო ინფრასტრუქტურის ნაწილად განიხილება.
თბილისსა და ბათუმს შორის მატარებლით მგზავრობა ოთხ საათამდე შემცირდა
შეწყვეტილია ხელშეკრულება გრიგოლეთი–ქობულეთის გზის მშენებელ კონტრაქტორთან – სამინისტრო
გრიგოლეთი-ქობულეთის მაგისტრალის ახალი, 6 კმ-იანი მონაკვეთი გაიხსნა
