„ქართული ოცნების“ ბათუმის საკრებულო მომდევნო სხდომაზე მიკროავტობუსების მოძრაობის მარშრუტებში ცვლილებების საკითხზე იმსჯელებს. წარმოდგენილი პროექტის მიხედვით, ცვლილებები გულისხმობს როგორც მოქმედი მარშრუტების ნაწილის გაუქმებას, ასევე ახალი მუნიციპალური მარშრუტის დამატებას.
კერძოდ, გაუქმებულია N24, N30, N32 და N36 ავტობუსების მარშრუტები. ამავე დროს, პროექტი ითვალისწინებს ახალი N35 მუნიციპალური მარშრუტის დამატებას, რომელიც შემდეგი მიმართულებით იმოძრავებს: თევდორე მღვდელის ქუჩა – ხახულის ქუჩა – ლეონიძის ქუჩა – შარტავას ქუჩა – აბუსერიძის ქუჩა – ჭავჭავაძის ქუჩა (საბაგირომდე).
დოკუმენტში აღნიშნულია, რომ ცვლილებების მიზანია მუნიციპალიტეტის მიერ დაგეგმილი ახალი მოძრაობის მარშრუტების დამტკიცება და არსებული სატრანსპორტო ქსელის ოპტიმიზაცია.
