ფოტო: აჭარა თაიმსი
ბათუმში, ევროპის მოედანზე, მიუსაფარი ცხოველების დაცვის მოთხოვნით მოქალაქეთა აქცია გაიმართა. შეკრებილებმა გააპროტესტეს ცხოველების მიმართ არაჰუმანური და სასტიკი მოპყრობა.
აქციის მონაწილეები აცხადებენ, რომ ბოლო პერიოდში გავრცელებულმა ინფორმაციამ ცხოველების მასობრივი დაჭერისა და სავარაუდო ევთანაზიის შემთხვევების შესახებ საზოგადოებაში განსაკუთრებული უკმაყოფილება გამოიწვია. მათი თქმით, არსებული მიდგომა პრობლემის სისტემურ გადაწყვეტას ვერ უზრუნველყოფს.
პროტესტის მონაწილეები ითხოვენ:
- მიუსაფარი ცხოველების მასობრივი განადგურების პრაქტიკის შეწყვეტას;
- სტერილიზაცია-კასტრაციის პროგრამების გაფართოებას;
- მუნიციპალური თავშესაფრების პირობების გაუმჯობესებას;
- ცხოველთა უფლებების დაცვის მკაცრ კონტროლს;
- გრძელვადიანი და ჰუმანური სტრატეგიის შემუშავებას.
აქციაზე ერთ-ერთ მოქალაქესა და მონაწილეთა ნაწილს შორის სიტყვიერი დაპირისპირებაც მოხდა. მოქალაქე, რომელიც ადგილზე ევროკავშირისა და საქართველოს დროშებით მივიდა, გარკვეული ჯგუფის უკმაყოფილების მიზეზი გახდა.
მიუხედავად იმისა, რომ ცხოველების მიმართ არაჰუმანური მოპყრობა „ქართული ოცნების“ პოლიტიკის შედეგია, უფლებადამცველების მიიჩნევენ, რომ პროტესტი აპოლიტიკურია და აქციაზე მსგავსი სიმბოლიკის, მათ შორის დროშების, ადგილი არ იყო.
» საარჩევნო პროგრამები მიუსაფარ ცხოველებზე ზრუნვის გარეშე
მოქალაქე თეონა ბერიძე „აჭარა თაიმსთან“ საუბრისას აცხადებს, რომ მისი პროტესტი „ქართული ოცნების“ პოლიტიკას უკავშირდება და ცხოველთა უფლებების საკითხი ამ კონტექსტში განიხილება.
მისი თქმით, მიუხედავად იმისა, რომ აქციის ნაწილი ცდილობს პროცესის აპოლიტიკურ ჩარჩოში დატოვებას, ცხოველთა დაცვის საკითხი საერთო პოლიტიკურ გარემოსთან მჭიდროდაა დაკავშირებული.
„მე გაცილებით ადრე დავიწყე პროტესტი, ვიდრე სხვებმა. იმიტომ დავიწყე, რომ „ქართული ოცნების“ პოლიტიკა არ მომწონს. ახლა დაემატა კიდევ ცხოველების უფლებები. ვიღაცებს დღემდე ეშინიათ, რომ რაღაც პოლიტიკური კლიშეების მატარებელი უნდა იყოთო და ამ პატარა დროშებმა გააღიზიანა. ამბობენ, რომ ეს არის აპოლიტიკური აქცია და მირჩიეს დროშები არ დამეჭირა. გაღიზიანდნენ დროშების გამო. ზოგადად, უნდა ვიცოდეთ, ევროკავშირი ცხოველების უფლებების დაცვისთვის ისეთ ნაბიჯებს დგამს, რაც საქართველოში ჯერ კიდევ შორს არის. რომელ ცხოველთა უფლებებზე ვსაუბრობთ, როცა „ქართულმა ოცნებამ“ ადამიანებიც კი მძიმე მდგომარეობამდე მიიყვანა,“ – განაცხადა თეონა ბერიძემ ჩვენთან საუბრისას.
აქვე დაგაინტერესებთ ⇓
- მიუსაფარი ძაღლები -მბათუმის აქციების ერთგული თანამგზავრები
- ქალს, რომელიც 150-მდე ძაღლზე ზრუნავს მერიამ თავშესაფრის დემონტაჟი მოსთხოვა
- „ეტყობა უვიცთა ბანდა დაჯდა და მოილაპარაკეს“ – ბათუმში ცხოველთა უფლებადამცველების აქცია გაიმართა
- „კუპატას“ სახელობის თავშესაფარი შესაძლოა ჩაქვში აღარ აშენდეს, უცნობია პროექტის დაწყების ვადებიც
- ოთხფეხა მეგობრები ხელოვნებაში
