შინაგან საქმეთა სამინისტროს ინფორმაციით, განსაკუთრებით დიდი ოდენობით ნარკოტიკული საშუალება „მეთადონი“ ამოიღეს, რომლის ღირებულება ე.წ. შავ ბაზარზე დაახლოებით 3 მილიონ ლარს შეადგენს.
უწყების ცნობით, განსაკუთრებით დიდი ოდენობით ნარკოტიკული საშუალების უკანონო შეძენა-შენახვისა და რეალიზაციის ხელშეწყობის ბრალდებით დაკავებულია ბელარუსის რესპუბლიკის ორი მოქალაქე – 1993 წელს დაბადებული ა.პ. და 1992 წელს დაბადებული გ.რ.
სამართალდამცველებმა ჩატარებული საგამოძიებო მოქმედებების ფარგლებში ბრალდებულების პირადი ჩხრეკის, ავტომანქანისა და დროებითი საცხოვრებელი სახლების დათვალიერების შედეგად, სარეალიზაციოდ გამზადებული, განსაკუთრებით დიდი ოდენობით ნარკოტიკული საშუალება „მეთადონი“ ნივთმტკიცებად ამოიღეს.
პოლიციის ინფორმაციით, ამასთანავე ამოღებულია ნარკოტიკული საშუალების დაფასოებისთვის საჭირო სხვადასხვა მასალა.
საქმეზე გამოძიება სისხლის სამართლის კოდექსის 260-ე და 260-ე კვარტა მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს.
