შინაგან საქმეთა სამინისტროს ინფორმაციით, ბათუმში პროსტიტუციის ხელშეწყობისა და პროსტიტუციისთვის ადგილის გადაცემის ბრალდებით სამი პირი დააკავეს.
უწყების განცხადებით, გამოძიებით დადგინდა, რომ ბრალდებულები სისტემატურად ხელს უწყობდნენ ქალებს სექსუალურ მომსახურებაში ჩართვაში და მათთვის შესაბამის პირობებს ქმნიდნენ.
შსს-ს ინფორმაციით, დაკავებულები არიან ჩინეთის მოქალაქე, 1987 წელს დაბადებული ი.ფ. და ტაილანდის მოქალაქეები — 1972 წელს დაბადებული პ.პ. და 1983 წელს დაბადებული ა.დ.
გამოძიების მიხედვით, ბრალდებულები ბათუმში მდებარე მასაჟის სალონებში ფართებს პროსტიტუციაში ჩაბმულ ქალებს გარკვეული თანხის სანაცვლოდ გადასცემდნენ. გარდა ამისა, ისინი აქტიურად ეხმარებოდნენ ქალებს კლიენტების მოძიებაში, რის სანაცვლოდაც სექსუალური მომსახურებიდან მიღებული ანაზღაურების ნაწილი თავად იღებდნენ.
აღნიშნულ ფაქტზე გამოძიება სისხლის სამართლის კოდექსის 254-ე მუხლით მიმდინარეობს, რაც პროსტიტუციის ხელშეწყობასა და პროსტიტუციისთვის ადგილის გადაცემას გულისხმობს და 7 წლამდე ვადით თავისუფლების აღკვეთას ითვალისწინებს.
