ბათუმში დასრულდა ევროპის გუნდური ჩემპიონატი ჭადრაკში, სადაც გამოვლინდნენ გამარჯვებულები როგორც ქალთა, ისე მამაკაცთა შორის.
ქალთა ტურნირში გამარჯვება პოლონეთის ეროვნულმა გუნდმა მოიპოვა. ვერცხლის მედალს დაეუფლა უკრაინის ნაკრები, ხოლო მესამე ადგილი გერმანიის გუნდმა დაიკავა.
მამაკაცთა შორის ევროპის ჩემპიონი უკრაინის გუნდი გახდა, ვერცხლის მედალი აზერბაიჯანის წარმომადგენლებს ხვდათ, ხოლო ბრინჯაოს მედალი – სერბეთის ნაკრებს.
ტურნირი ცხრა ტურად ჩატარდა შვეიცარიული სისტემით, ორ კატეგორიაში – ღია და ქალთა შორის.
შეჯიბრებაზე ასევე დაჯილდოვდნენ ინდივიდუალური დაფების გამარჯვებულები, სადაც ქართველმა მოჭადრაკეებმა წარმატებას მიაღწიეს:
ლელა ჯავახიშვილმა (მესამე დაფა) მეორე ადგილი დაიკავა, ხოლო ბელა ხოტენაშვილმა (მეოთხე დაფა) პირველი ადგილი მოიპოვა.
ევროპის გუნდური ჩემპიონატი 4–14 ოქტომბრის პერიოდში ბათუმში გაიმართა. ტურნირში მონაწილეობდა ევროპის 39 ქვეყნის 400-მდე მოჭადრაკე. შეჯიბრებაში ჯამში 76 გუნდი ასპარეზობდა — 40 ღია და 36 ქალთა კატეგორიაში.
ავტორი: დიმიტრი გორგილაძე
