ბათუმში, კახაბრის ქუჩაზე მცხოვრებლები ინფრასტრუქტურული პრობლემების მოგვარებას ითხოვენ და ამბობენ, რომ წლებია შესაბამის უწყებებს უშედეგოდ მიმართავენ.
ადგილობრივების თქმით, დასახლებაში არ არსებობს საკანალიზაციო და სანიაღვრე სისტემა, რის გამოც ტერიტორიაზე გაუსაძლისი სუნი დგას და მომრავლებულია მღრნელები, ასევე, ქვეწარმავლები. არსებული არხი ღია მდგომარეობაშია და ადგილობრივები მის დახურვას ითხოვენ.
„ამ დასახლებაში ძალიან ცუდი მდგომარეობაა. ვირთხები მომრავლებულია, ზაფხულობით კი ქვეწარმავლები ჩნდება. კანალიზაციის საშინელი სუნია და ფაქტობრივად ვიწამლებით. კანალიზაცია პირდაპირ მდინარეში ჩაედინება, რის გამოც ცხოვრება უკვე შეუძლებელია. ნუთუ არ შეიძლება, არხი გაიწმინდოს და დაიხუროს? ძალიან ბევრჯერ მივმართეთ შესაბამის უწყებებს, ხელმოწერებიც შევაგროვეთ. ვფიქრობდით გზის გადაკეტვასაც, იქნებ ასე მაინც მოგვაქციონ ყურადღება. იყო დაპირებები ინფრასტრუქტურის მოწესრიგების შესახებ, თუმცა შედეგი დღემდე არ არის,“ – ამბობს ჩვენთან საუბრისას ბეჟან ჯავახიძე.
გარდა ამისა, დასახლებაში ინტენსიური მოძრაობაა, თუმცა ტროტუარები არ არსებობს, რის გამოც ქვეითებს სამანქანე გზაზე გადაადგილება უწევთ. ასევე არ არის განთავსებული საგზაო ნიშნებიც, რაც დამატებით რისკებთანაა დაკავშირებული.
მოსახლეობა დამატებით ითხოვს მოსასვენებელი სივრცის მოწყობასაც, მათ შორის ფანჩატურისა და ბავშვებისთვის გასართობი ატრაქციონების მონტაჟს.
ადგილობრივები აცხადებენ, რომ პრობლემების მოგვარების მოთხოვნით არაერთხელ მიმართეს ბათუმის მერიასა და აჭარის მთავრობას, თუმცა უშედეგოდ. მათი თქმით, „ქართული ოცნებას“ ისინი მხოლოდ არჩევნების პერიოდში არხენდებათ.
