დიდმა ბრიტანეთმა პროპაგანდისტულ ტელევიზიებს – ტელეკომპანია „იმედისა“ და „POSTV“-ს სანქციები დაუწესა. ბრიტანეთის განცხადებით, ორივე ტელევიზია ჩართული იყო რუსული დეზინფორმაციის გავრცელებაში, განსაკუთრებით უკრაინაში რუსეთის სრულმასშტაბიანი შეჭრის კონტექსტში.
ოფიციალურ განმარტებაში აღნიშნულია, რომ აღნიშნული მედიასაშუალებები საკუთარ აუდიტორიას, რომელიც ძირითადად საქართველოშია, განზრახ აწვდიდნენ მცდარ ინფორმაციას უკრაინის წინააღმდეგ მიმდინარე ომის შესახებ. ბრიტანეთის შეფასებით, ეს ქმედებები ხელს უწყობს უკრაინის დესტაბილიზაციას და მისი სუვერენიტეტისა და ტერიტორიული მთლიანობის შერყევას ემსახურება.
კერძოდ, განცხადებაში ხაზგასმულია, რომ ტელევიზიები რეგულარულად ავრცელებდნენ ნარატივებს იმის შესახებ, თითქოს უკრაინის ხელისუფლება და პრეზიდენტი ვოლოდიმირ ზელენსკი არალეგიტიმურები არიან, უკრაინა დასავლეთის „მარიონეტია“, ქვეყანა კორუმპირებულია და დასავლეთი საქართველოს დესტაბილიზაციას ცდილობს.
სანქციების ფარგლებში ორივე ტელევიზიას შეეხება:
- აქტივების გაყინვა;
- სატრასტო (ნდობით აღჭურვილი) მომსახურების აკრძალვა;
- დიდი ბრიტანეთის იურისდიქციაში კომპანიის დირექტორის პოზიციის დაკავების აკრძალვა.
ბრიტანეთის განმარტებით, აღნიშნული შეზღუდვები მიზნად ისახავს დეზინფორმაციის გავრცელებაზე რეაგირებას და სანქციების შესაძლო გვერდის ავლის გზების მაქსიმალურ შეზღუდვას.
