„დინამო ბათუმმა“ საქართველოს ეროვნული ლიგის მესამე ტურში „გაგრას“ 2:1 სძლია. ეს ბათუმური კლუბის პირველი გამარჯვებაა მიმდინარე სეზონში.
„აჭარაბეთ არენაზე“ გამართული დაპირისპირება საკმაოდ დაძაბული აღმოჩნდა. „თოლიებმა“ ანგარიში მეცხრე წუთზე ლუკა წულუკიძის გოლით გახსნეს, თუმცა „გაგრამ“ მე-16 წუთზე ლევან გეგეჭკორის ზუსტად შესრულებული პენალტით გაათანაბრა. ბათუმელებმა სწრაფადვე დაიბრუნეს ლიდერობა — მე-20 წუთზე უერდი მარამ ანგარიში 2:1 გახადა.
მეორე ტაიმში ორივე გუნდი აქტიურად ცდილობდა მეტოქის კარის აღებას, არაერთი სახიფათო მომენტი შექმნეს, თუმცა მეორე ნახევარი უგოლოდ დასრულდა.
„დინამო ბათუმი“ შემდეგ შეხვედრას 15 მარტს ჩაატარებს. ბათუმური კლუბი ეროვნული ლიგის მეოთხე ტურში ჩემპიონატის ლიდერსა და მოქმედ ჩემპიონ „იბერია 1999“-ს შეხვდება. მატჩი თბილისში, დავით პეტრიაშვილის სახელობის სტადიონზე გაიმართება.
ავტორი: დიმიტრი გორგილაძე
