ევროკავშირის წევრმა სახელმწიფოებმა “დემოკრატიის დაცვის პაკეტის” ფარგლებში, ეროვნული საჯარო რეესტრი უნდა განაახლონ. ამის შესახებ ევროკომისიის სხდომაზე ვიცე-პრეზიდენტმა ვერა იუროვამ და დემოკრატიის საკითხებში ევროკომისარმა, დუბრავკა შუიცამ ისაუბრეს. ბრიუსელში წარმოდგენილი პაკეტი უცხოური გავლენების შესახებ კანონპროექტის ერთ-ერთი შემადგენელი ნაწილია.
ახალი კანონპროექტის მიზანი მესამე ქვეყნების სახელით ინტერესების წარმომადგენლობის ქმედებების გამჭვირვალობასა და დემოკრატიულ ანგარიშვალდებულებას ითვალისწინებს.
როგორც ევროკომისიის ოფიციალურ ვებ-გვერდზეა ნათქვამი, “დემოკრატიის დაცვის პაკეტის” ფარგლებში გასაჯაროვდება მესამე ქვეყნის სუბიექტების საქმიანობასთან დაკავშირებული მონაცემების ძირითადი ელემენტების, კერძოდ – მიღებული წლიური თანხის, დაინტერესებული მესამე ქვეყნების და საქმიანობის მთავარი მიზნები.
ვერა იუროვას თქმით, ახალი კანონპროექტი დემოკრატიისთვის უსაფრთხო გარემოს შექმნისთვისა და სახელმწიფო სტრუქტურების მეტი თავდაცვისთვის არის შექმნილი.
„დემოკრატია ევროპაში არის მდგრადი, თუმცა ის საჭიროებს მუდმივ ზრუნვასა და დაცვას არა მხოლოდ ევროკავშირის ინსტიტუტების, არამედ ყველა ჩვენგანის, განსაკუთრებით, მოქალაქეების მხრიდან. ჩვენი მიზანია, მეტი ინსტრუმენტი მივცეთ მათ, ვინც ზრუნავს დემოკრატიაზე, რათა კონტროლი და ბალანსი იყოს უფრო ეფექტიანი. ჩვენ ვერ უგულებელვყოფთ იმ რისკებს, რომლებიც დემოკრატიას გარედან ემუქრება“, – განაცხადა ევროკომისიის ვიცე-პრეზიდენტმა, ვერა იუროვამ.
