„ვინც ეძებს, ის პოულობს“ – ამ ოპტიმისტური განწყობით გადიან ისინი ყოველდღე ზღვის სანაპიროზე. ხელში მეტალოდეტექტორებით, თვალით ქვიშისკენ და იმედით, რომ მორიგი გასეირნება საინტერესო აღმოჩენით დასრულდება.
ქობულეთის სანაპიროზე, განსაკუთრებით შემოდგომის სეზონზე, ოქროსა და სხვა ძვირფასი ლითონების მაძიებლების ნახვა ჩვეულებრივი ამბავია. ისინი საათობით მიუყვებიან პლაჟს და მეტალოდეტექტორით ქვიშას ამოწმებენ.
ზღვის ტალღებს ნაპირზე ხშირად სხვადასხვა ნივთი გამოაქვს, მათ შორის სამკაულები, მონეტები და სხვა ლითონის ნივთები, რომლებიც დამსვენებლებს ზაფხულის განმავლობაში ეკარგებათ. თუ გაუმართლათ, სახლში საინტერესო აღმოჩენით ბრუნდებიან. თუ არა, კიდევ ერთი დღე უშედეგო ძებნაში გადის.
ჩვენი რესპონდენტი ქობულეთის სანაპიროზე ძვირფას ლითონებს დაახლოებით ხუთი წელია ეძებს. ამბობს, რომ ყველაზე მეტად ოქროს პოვნა აინტერესებს, თუმცა დღევანდელი ძებნა მისთვის უშედეგო აღმოჩნდა.
ოქროს მაძიებლის თქმით, კარგი სეზონი სწორედ ზაფხულია, როცა სანაპიროზე ბევრი ტურისტია. რაც უფრო მეტი ადამიანია პლაჟზე, მით უფრო იზრდება დაკარგული ნივთების რაოდენობაც. შემოდგომაზე კი, როცა ზღვა ძლიერდება და სანაპიროზე შტორმული ამინდებია, მაძიებლებისთვის ახალი შესაძლებლობები ჩნდება.
მათივე გამოცდილებით, სწორედ შტორმის შემდეგ არის პლაჟზე ძვირფასი ნივთის პოვნის მეტი შანსი. ერთი ნივთის პოვნას ზოგჯერ მთელი დღე სჭირდება. მაძიებლები საათობით დადიან ერთი და იმავე მონაკვეთში, მეტალოდეტექტორის სიგნალს ამოწმებენ, ქვიშას თხრიან და შემდეგ გზას ისევ აგრძელებენ.
ყველა სიგნალი ოქრო არ არის. ხშირად აღმოჩენილი ნივთი უბრალოდ ლითონის ნაგავია, ძველი მონეტა ან სხვა მცირე ზომის ნივთია. თუმცა ყოველი ახალი სიგნალი იმედს აჩენს, რომ ამჯერად შეიძლება ძვირფასი რამ აღმოჩნდეს.
ქობულეთის სანაპიროზე ოქროს ადგილობრივებთან ერთად უცხოელებიც ეძებენ. მაძიებლების თქმით, ბოლო პერიოდში კონკურენციაც გაიზარდა, შესაბამისად, სასურველი ნივთის პოვნის შანსიც შემცირდა.
